Satta Parvai - சட்டப்பார்வை - The Legal Vision

பூஜை அறை எப்படி இருக்க வேண்டும் ?

2012-01-17T14:26:00.003+05:30

மனதிற்கு நிம்மதியை தருவது ஆண்டவன் சன்னிதி. அதுபோலவே ஒரு வீட்டில் உள்ள பூஜை அறையும். அது எப்படி இருக்க வேண்டும் என்பதற்கு சில முக்கிய குறிப்புகள் வருமாறு.

ஒரு வீட்டில் பூஜை அறை வட கிழக்கில் அல்லது வடக்கில் அல்லது கிழக்கில் அமைக்கப்பட வேண்டும். பெரிய வீடாக இருந்தால் வீட்டின் மையப் பகுதியில் பூஜை அறை அமைக்கலாம்.

ஒரு பெரிய வீட்டில் இரண்டு தளங்கள் இருந்து எல்லோரும் அந்த வீட்டில் ஒரு குடும்பமாக வசித்தால் அவற்றில் தரை தளத்தில் பூஜை அறை இருக்க வேண்டும்.

பூஜை அறையில் கடவுளின் படம் அல்லது உருவம் கிழக்கு திசை பார்த்து இருக்க வேண்டும். அதாவது நாம் வணக்கும் போது கடவுளின் படங்கள் கிழக்கு பார்த்து இருக்க வேண்டும். மேற்கு நோக்கியும் இருக்கலாம்.

பூஜை அறையின் வழிபடும் பகுதியில் வட கிழக்கு மூலையில் ஒரு பித்தளை சொம்பில் அல்லது டம்ப்ளரில் நீர் பிடித்து வைக்க வேண்டும். இந்த நீரை தினமும் மாற்ற வேண்டும்.

தென் - கிழக்கு மூலையில் குத்து விளக்கை வைத்து விளக்கேற்ற வேண்டும்.

முக்கியமாக கவனிக்க வேண்டியது, பூஜை அறையில் இறந்து போன முன்னோர்களின் புகைப்படங்களை வைக்கக் கூடாது.

பூஜை அறையை குப்பைகள் இன்றி சுத்தமாக வைத்திருக்க வேண்டும்.

பூஜை அறை சுவர்களின் வண்ணம் வெள்ளை அல்லது இள மஞ்சள் அல்லது நீல நிறத்தில் இருக்க வேண்டும்.

பூஜை அறையை வழிபடுவதற்கு, தியானம் செய்வதற்கு மட்டும் பயன்படுத்த வேண்டும்.

சில வீடுகளில் இடப் பற்றாக்குறை காரணமாக படுக்கை அறை அல்லது சமையல் அறை சுவர்களில் உள்ள அலமாரிகளை பூஜை அறையாக பயன்படுத்துவதுண்டு. அப்படி இருந்தால் வழிபடும் நேரம் தவிர அந்த அலமாரியை மூடி வைக்க வேண்டும். அதாவது கதவு இருந்தால் அதை அடைத்து வைக்க வேண்டும். அப்படி இல்லாவிட்டால் துணித் திரை கொண்டு மூடி வைக்க வேண்டும். சிலசமயங்களில் கதவு உள்ள மரப் பெட்டிகளில் கடவுள் படங்களை வைத்து வழிபடுவதும் உண்டு. இதை சமையல் அறையின் வடகிழக்கு மூலையில் வைக்கலாம்.

கழிப்பறையின் சுவர்களில் உள்ள அலமாரிகளில் மேற்கண்டவாறு பூஜை அறை அமைக்கக் கூடாது. அதை கண்டிப்பாக தவிர்க்க வேண்டும்.

பூஜை அறைக்கு இரண்டு கதவுகள் இருக்க வேண்டும். அவை வெளிப்புறமாக திறக்கும்படி இருக்க வேண்டும்.

ஒரு பூஜை அறை மாடிப்படிகளின் கீழ் அமைந்து இருக்கக் கூடாது.

பூஜை அறையில் மந்திர உச்சாடனங்களை தினமும் ஒன்றிரண்டு தடவை ஒலிபரப்பாகும்படி செய்ய வேண்டும் அல்லது நாமும் வாய் விட்டு உச்சாடனம் செய்யலாம். இது வீட்டில் நேர்மறை எண்ணங்களை கொண்டு வரும்.

அனைத்தையும் விட பூஜை அறையில் மனதை ஒருமுகப்படுத்தி, தீர்க்கமாக நமது பிரார்த்தனையை கடவுளிடம் முன் வைக்க வேண்டும். அது ஒரு நிமிடம் நீடித்தாலும் கூட போதுமானது.

நன்றி : architectureideas.info.

சில வரிச் சிந்தனைகள் ....

2012-01-11T13:35:00.002+05:30

நுகர்வோருக்காக வழக்கிடும் அவரது முகவர் வழக்குரைஞராக இருக்க வேண்டுமென்ற அவசியமில்லை - உச்ச நீதிமன்றம் முக்கிய தீர்ப்பு

2011-12-25T17:20:00.006+05:30

நுகர்வோருக்காக வழக்குரைஞர் அல்லாத ஒரு முகவரும் வழக்கு நடத்தலாம் - உச்ச நீதிமன்றத்தின் முக்கிய தீர்ப்பு

நுகர்வோர் ஒருவர் தனது வழக்கை தனது அதிகாரம் பெற்ற ஒரு முகவரை (ஏஜென்ட்) கொண்டு நுகர்வோர் குறை தீர் மன்றங்களில் நடத்தலாம் என்றும், அத்தகு முகவர் ஒரு வழக்குரைஞராக இருக்க வேண்டிய அவசியமில்லை என்றும், மருத்துவ கவனக்குறைவு வழக்குகளில் சம்பந்தப்பட்ட மருத்துவருக்காக அல்லது அவருக்கெதிராக இன்னொரு மருத்துவர் வழக்கு நடத்தலாம் என்றும் அண்மையில் உரிமையியல் மேல்முறையீடு ஒன்றில் நமது உச்ச நீதிமன்றம் தீர்ப்புரைத்துள்ளது.

மாவட்ட நுகர்வோர் குறை தீர் மன்றத்தில் எழுந்த வழக்கு என்ன?

சேவைக் குறைபாடு தொடர்பாக சுற்றுலா நடத்துனர்கள் இருவர் மீது நுகர்வோர் ஒருவர் தெற்கு மும்பை மாவட்ட நுகர்வோர் மன்றத்தில் வழக்கிடுகிறார். அந்த நுகர்வோர் தனது வழக்கை நடத்த முகவர் ஒருவருக்கு அதிகாரம் அளித்திருந்தார். இப்புகார் நிலுவையில் இருக்கும் போது, எதிர் தரப்பினர்களான அச்சுற்றுலா நடத்துனர்கள் இடைநிலை மனு ஒன்றை தாக்கல் செய்தனர். அதில் புகார்தாரரான நுகர்வோருக்காக வழக்கு நடத்த அவரது முகவருக்கு அனுமதி வழங்கக் கூடாது என்றும், காரணம் அந்த முகவர் ஒரு வழக்குரைஞராக தன்னை பதிவு செய்து கொள்ளாதவர் என்றும் குறிப்பிட்டிருந்தனர். இதை ஆராய்ந்த மும்பை மாவட்ட மன்றம், நுகர்வோரின் அதிகாரம் பெற்ற முகவர் தன்னை ஒரு வழக்குரைஞராக பதிவு செய்து கொள்ளாத காரணத்தால், மாவட்ட மன்றத்தின் முன் தோன்றவோ, வாதுரைக்கவோ உரிமை பெற்றவர் அல்ல என்று தீர்ப்புரைத்தது.

ஆனால் இதே போன்ற பிரச்னை எழுந்த மற்றொரு புகாரில், நுகர்வோரின் அதிகாரம் பெற்ற முகவர்கள் அவருக்காக நுகர்வோர் மன்றங்களில் புகார் தாக்கல் செய்ய, செயல்பட, தோன்ற, வாதிட உரிமை பெற்றவர்கள் என்று தீர்ப்புரைக்கப்பட்டது.

மாநில நுகர்வோர் ஆணையத்தில் முறையீடு:

இப்பிரச்சனைகளில் வழங்கப்பட்ட தீர்ப்புக்கு எதிராக மாநில நுகர்வோர் ஆணையத்தில் முறையீடு செய்யப்பட்டன. அது, நுகர்வோரின் அதிகாரம் பெற்ற முகவர்கள் தோன்றி நடத்தும் வழக்குகளுக்கு எல்லாம் தடையாணை பிறப்பித்தது. அதே நேரத்தில் நுகர்வோர் மன்றங்களில் நுகர்வோரின் முகவர்கள் தோன்றுவதிலிருந்து தடை விதித்து மாவட்ட மன்றங்கள் பிறப்பித்த உறுத்துக்கட்டளைக்கு தடையாணை பிறப்பிக்க மறுத்துவிட்டது. இதனால் நுகர்வோர் மன்றங்களில் அதிகாரம் பெற்ற முகவர்கள் தோன்றும் ஏராளமான வழக்குகள் அப்படியே நின்று போயின.

பம்பாய் உயர் நீதிமன்றத்தில்
நீதிப்பேராணை (ரிட்) மனுக்கள் தாக்கல் :

மாநில ஆணையம் மேற்கண்டவாறு பிறப்பித்த தடையாணைகளுக்கு எதிராக பம்பாய் உயர் நீதிமன்றத்தில் இரண்டு நீதிப்பேராணை மனுக்கள் தாக்கல் செய்யப்பட்டன. அம்மனுக்களை பம்பாய் உயர் நீதிமன்றத்தின் ஈராயம் அனுமதித்து ஆணையிட்டன. அதில், "1986-ஆம் ஆண்டில் இயற்றப் பட்ட நுகர்வோர் பாதுகாப்பு சட்டத்தின் கீழ் கட்டமைக்கப்பட்ட நுகர்வோர் மன்றங்கள், 'ஒரு உரிமையில் நீதிமன்றத்தின் அம்சங்களை கொண்டதாகும்' (trappings of a Civil Court) என்றும், ஆனால் அவை, "உரிமையியல் நடைமுறை சட்ட வகை முறைகளின் கீழ் உரிமையியல் நீதிமன்றங்கள் அல்ல (are not civil courts within the meaning of the provisions of the Code of Civil Procedure)' என்றும்" கருத்துரைத்தது.

இதன் அடிப்படையில், முடிவில் மாவட்ட மன்றம் அல்லது மாநில ஆணையத்தில் வழக்கிடும் நுகர்வோர் ஒருவர் தனது வழக்குக்காக வழக்குரைஞர் ஒருவரை நியமனம் செய்து கொள்ள வேண்டும் என்று கட்டாயப்படுத்தப்படக் கூடாது என்றும், அவ்வாறு வழக்குரைஞர் அல்லாத முகவர் ஒருவர் நுகர்வோர் மன்றங்களில்/ஆணையங்களில் தோன்றுவது 1961 -இன் வழக்குரைஞர் சட்டத்தின் வகைமுறைகளுக்கு முரண்பட்டதல்ல என்றும் பம்பாய் உயர் நீதிமன்றம் தீர்ப்புரைத்தது.

மேலும் மற்றொரு முக்கிய கருத்தையும் பம்பாய் உயர் நீதிமன்றம் முன் வைத்தது. அதாவது, வருமான வரிச் சட்டம், விற்பனை வரிச் சட்டம், முற்றுரிமை மட்டும் தடுப்பூட்டும் வணிக நடவடிக்கை (Monopolies and Restrictive Trade Practices Act) சட்டம் ஆகியன சம்பந்தப்பட்ட அதிகராமைப்புகளுக்கு முன் வழக்குரைஞர்கள் அல்லாதவர்களையும் தரப்பினர்களுக்காக பேச, வாதிட அனுமதி அளிக்கின்றன. அவர்களை சட்டத் தொழில் புரிபவர்களாக கூற முடியாது. அவ்வாறே 1986-ஆம் நுகர்வோர் பாதுகாப்பு சட்டத்தின் கீழ் 2000 -ஆம் ஆண்டில் வகுக்கப்பட்ட விதிகள் மாவட்ட மன்றங்களில் நுகர்வோர்களுக்காக அதிகாரமளிக்கப்பட்ட முகவர்கள் தோன்றுவதை அனுமதிக்கின்றன. அவ்வாறு தோன்றுவதை வழக்குரைஞர்கள் சட்டம் பிரிவு 33-க்கு முரண்பட்ட ஒன்று என்று கூற முடியாது என பம்பாய் உயர் நீதிமன்றம் விளக்கமளித்தது.

ஒருவேளை அத்தகு முகவர்கள், மாவட்ட மன்றம்/மாநில ஆணையத்தில் ஒழுங்கீனமாக நடந்து கொண்டால் அவர்களது வாதத்தை அந்த குறிப்பிட்ட வழக்கில் கேட்க மறுத்து அவை ஆணையிடலாம். அதற்கு அவற்றுக்கு அதிகாரம் உண்டு என்றும் பம்பாய் உயர் நீதிமன்றம் தெளிவுபடுத்தியது.

உச்ச நீதிமன்றத்தில் உரிமையியல் மேல்முறையீடு

எனினும் இத்தீர்ப்பினால் குறையுற்ற எதிர் மனுதாரர்கள் உச்ச நீதிமன்றத்தில் இரண்டு மேல்முறையீடுகள் செய்தனர். அம்மேல் முறையீடுகளை ஆராய்ந்த இரண்டு நீதிபதிகள் அடங்கிய ஈராயம், அவற்றில் சட்ட முக்கியத்துவம் வாய்ந்த பிரச்சனை அடங்கியுள்ளது என்பதால்,அவற்றை மூன்று நீதிபதிகள் அடங்கிய ஆயத்தின் முன் முடிவுக்கு வைத்தது.

அம்மேல்முறையீடுகளை மாண்பமை நீதியரசர்கள் தல்வீர் பண்டரி, முனைவர் முகுன்டகம் சர்மா மற்றும் அணில் ஆர்.தேவே ஆகியோர் அடங்கிய ஆயம் பல்வேறு முன் தீர்ப்பு நெறிகள், சட்ட திட்டங்கள், பல நாட்டு சட்ட நிலைப்பாடுகள் ஆகியவற்றின் துணை கொண்டு ஆராய்ந்தது.

அது தனது தீர்ப்பில் பல்வேறு சர்ச்சைகளுக்கு விளக்கமளித்து, முற்றுப் புள்ளி வைத்தது. அது தனது தீர்ப்பில் பம்பாய் உயர் நீதிமன்றம் எடுத்த மேற்கண்ட முடிவுகள் யாவும் சரியான ஒன்றே என ஏற்றுக் கொண்டது. மாவட்ட மன்றங்கள் / மாநில ஆணையங்கள் ஆகியவற்றில் நுகர்வோர்களுக்காக அவரது அதிகாரமளிக்கப்பட்ட முகவர்களை வாதிட அனுமதிக்கலாம், அம்முகவர்கள் சட்டத் தொழில் ஆற்றுபவர்களாக, வழக்குரைஞர்களாக இருக்க வேண்டுமென்பதில்லை என்ற கருத்தை பல்வேறு காரணங்களின் அடிப்படையில் சரியென அங்கீகரித்தது.

மருத்துவரின் வழக்குக்கு மற்றொரு மருத்துவர் தோன்றி வாதிடலாம்

பொறியாளருக்கு எதிரான வழக்கில் புகார்தாரருக்காக மற்றொரு பொறியாளர் வழக்கு நடத்தலாம்

இது தொடர்பாக உச்ச நீதிமன்றம் 'மகாராஷ்டிரா நுகர்வோர் பாதுகாப்பு விதிகளை' பரிசீலிக்கையில், பின்வரும் கருத்துகளை தெளிவுபடுத்தியது. அதாவது, "நுகர்வோர் பாதுகாப்பு சட்டத்தின் கீழ் எழும் வழக்குகள் சிறிய அளவிலான இழப்பீட்டுக் கோரிக்கைகளை கொண்டவை. எல்லா வழக்குகளிலும் வழக்குரைஞர்களை நியமனம் செய்வது என்பது பொருளாதாரரீதியாக சரி வராது. அதே நேரத்தில் பல வழக்குகள் துறை சார்ந்த நிபுணர்களின் உதவி தேவைப்படுவதாக இருக்கும். எடுத்துக் காட்டாக, ஒருவர் மருத்துவ கவனக் குறைவுக்காக மருத்துவமனை மீது வழக்கிடலாம்; அல்லது கட்டட வரைபடத்தை தவறாக வரைந்து கொடுத்தமைக்காக வரைகலைஞர் மீது வழக்கிடலாம்; அல்லது கட்டடத்தை தவறாக கட்டிக் கொடுத்தமைக்காக கட்டட ஒப்பந்தக்காரர் மீது வழக்கிடலாம். இப்படிப்பட்ட வழக்குகளில், மருத்துவர், வரைகலை நிபுணர், பொறியாளர் போன்ற தொழிலாற்றுனர்கள், ஒரு வழக்குரைஞரை விட பொருத்தமானவர்கள் ஆவர். எனவே, புகார்தாரர் மற்றும் எதிர்தரப்பினர் ஆகிய இருவருக்கும் தங்கள் வழக்கை நடத்த அவர் வழக்குரைஞர் அல்லது சம்பந்தப்பட்ட துறையில் வல்லுனர்களாக இருக்கும் வேறு எவரையும் நியமனம் செய்யலாம், அதற்கு அவருக்கு உரிமை உண்டு. இந்நிலைப்பாடு வழக்கின் இரு தரப்பினரையும் சமமான நிலையில் வைக்கின்றது," உச்ச நீதிமன்றம் கூறியது.

விதிகள் வகுக்கும்படி தேசிய ஆணையத்திற்கு

உச்ச நீதிமன்றம் ஏவுரை

மேலும் இது குறித்து விதிகளை வகுக்கும்படி தேசிய நுகர்வோர் ஆணையத்திற்கு உச்ச நீதிமன்றம் சில ஆலோசனைகளை முன் வைத்தது. அவற்றின்படி அந்த முகவர் தனியொரு வழக்கு என்ற அடிப்படையில் தோன்ற வேண்டும். நுகர்வோருக்கும் முகவருக்கும் ஏற்கனவே ஏதாவது ஒரு வகையில் தொடர்பு இருக்க வேண்டும். (எடுத்துக்காட்டாக, உறவினர், அண்டை வீட்டுக்காரர், தொழில் துணைவர் அல்லது நெருங்கிய நண்பர் போன்று), மேலும் வழக்குக்காக கட்டணம் ஏதும் பெற்றுக் கொள்ளவில்லை என்று மாவட்ட மன்றத்தின் முன் அம்முகவர் விளம்புகை செய்ய வேண்டும், தரப்பினருக்காக தான் வழக்காட தகுதி பெற்றவர் என்பதை மாவட்ட மன்ற தலைவர் முன் காட்ட வேண்டும். இவ்வாறு பல்வேறு யோசனைகளை உச்ச நீதிமன்றம் முன் வைத்து அவற்றை விதிகளாக வகுப்பதற்கு பரிசீலனை செய்யும்படி தேசிய ஆணையத்திற்கு ஏவுரைத்தது.

முடிவு

முடிவில் முன் சொன்னபடி பம்பாய் உயர் நீதிமன்றத்தின் தீர்ப்பை உறுதி செய்து, அதற்கு எதிராக தாக்கல் செய்யப்பட்ட மேல்முறையீடுகளை உச்ச நீதிமன்றம் தள்ளுபடி செய்தது.

முழு நீள ஆங்கிலத் தீர்ப்புக்கு

பின்வரும் இணைப்பின் மீது சொடுக்கவும்

http://indiankanoon.org/doc/1399474/

C.Venkatachalam Vs. Ajitkumar C.Shah and Ors. - C.A.No. 868 of 2003 and Bar Council of India Vs. Sanjay R.Kothari and Ors. - C.A.No. 869 - 870 of 2003 - Supreme Court of India - Dalveer Bhandari, Dr. Mukundakam Sharma & Anil R. Dev, JJ. - Decided on 29-08-2011.

இழப்பீடு வழக்கில் விபத்து ஏற்படுத்திய வாகனத்தை தீர்ப்பிற்கு முன் பற்றுகை (ஜப்தி) செய்ய முடியுமா?

2011-12-24T12:38:00.002+05:30

இயக்கூர்திகள் சட்டம் (59/1988), பிரிவு 169 - உரிமையியல் நடைமுறை சட்டம், கட்டளை 38, விதி 5; கட்டளை 41, விதி 23-A. -

வழக்கின் சங்கதிகள்படி, விபத்து ஏற்படுத்திய 'டிராக்டர் மற்றும் ட்ரைலர்' வாகன உரிமையாளர் மீது இழப்பீடு கோரி மனு தாக்கல் செய்யப்படுகிறது. அத்துடன் அந்த வாகனத்தை 'தீர்ப்பிற்கு முன் பற்றுகை' (Attachment before judgment) செய்யவும் மனு தாக்கல் செய்யப்படுகிறது. இவ்வாறு மனு தாக்கல் செய்ய முடியுமா எனும் கேள்வி ஆந்திரப்பிரதேச உயர் நீதிமன்றத்தின் முன் எழுந்த போது, உரிமையியல் நடைமுறை சட்டத்தின் கட்டளை 38, விதி 5-இல் கண்ட வகைமுறைகள் (தீர்ப்பிற்கு முன் பற்றுகை செய்வது குறித்த நடைமுறைகளைக் கூறுவது), இயக்கூர்திகள் சட்டத்தின் கீழான நடவடிக்கைகளுக்கும் பொருந்தும் என்று நிலை நிறுத்தப்பட்டது.

எனவே, விபத்து வழக்குகளில் இழப்பீட்டிற்கான முடிவான தீர்வம் பகரப்படுவதற்கு முன்னதாக அத்தீர்வத் தொகையை பின்னிட்டு வசூலிப்பதற்கு உதவிகரமாக இருப்பதற்காக சம்பந்தப்பட்ட வாகனத்தை பற்றுகை (ஜப்தி) செய்யலாம். தீர்வத்திற்கு பிறகு அவ்வாகனத்தை ஏலம் விடுவதற்கான நடவடிக்கைகளை மேற்கொள்ளலாம்.

(Duvvuru Siva Kumar Reddy and etc. v. Malli Srinivasulu and etc.)

அணிலைப் போலவாவது வாழ்வோமே !

2011-12-23T03:30:00.004+05:30

" ராமர் போல் அவதாரமாய் இருந்திருந்தால்

இலங்கை அசுரர்களை அழித்திருப்போம் .....

அனுமன் போல் பலமிருந்திருந்தால்

இலங்கைக்கு தீ இட்டு இருப்போம் ...

ஓடி வந்து உதவிட மனமிருந்தும்

இயலாமையால் தவிக்கிறோம் ....

காலம் கனியும் பொழுதினில்

அவதாரமாய்,பலவானாய்..

உதவ இயலாவிட்டாலும்

நிச்சயம் துரும்பெடுத்து போடுவோம்

அணில் பிள்ளை போல் .............."

இது அண்மையில் நான் படித்த, கவிஞர் சுஜா எழுதிய கவிதை. அப்படி ஒரு சிறு துரும்பெடுத்து போட்டதற்கே, இராமாயணத்தில் அணிலுக்கு மிகச் சிறப்பானதொரு இடம் கிடைத்தது.

சீதையை மீட்க, கடலைத் தாண்டி இலங்கைக்குச் செல்ல பாலம் அமைக்கப்பட்டது. பாலவேலை நடந்த இடத்தில் இருந்த அணில், வானரங்களோடு சேர்ந்து பணிசெய்து ராமபிரானின் அருளுக்கு பாத்திரமாக வேண்டும் என்று எண்ணியது. கடல் நீரில் மூழ்கி, கடற்கரை மணலில் புரண்டு எழுந்தது. ஈரவுடம்பில் ஒட்டிக் கொண்ட மணலை குரங்குகள் போட்ட பாறையில் உதிர்த்துவிட்டு வந்தது. (சில குறிப்புகளில் அது மிகச் சிறிய கூழாங் கற்களை தனது வாயில் கவ்வி கொண்டு வந்து இட்டது எனப்படுகிறது). இப்படி இங்குமங்கும் ஓடிக் கொண்டிருந்த அணிலின் செயலை கவனித்தார் ராமன். அன்போடு அதன் முதுகில் தனது கைகளால் தடவிக் கொடுத்தார். அது அணிலின் முதுகில் மூன்று வெள்ளைக் கோடுகளாக விழுந்தன. அன்றுமுதல் அணில் ராமபிரானுக்கு மட்டுமல்ல, நமக்கும் அன்பிற்குரிய பிராணியாகிவிட்டது.

இந்த ராமாயண குறுங்கதை சொல்லாமல் சொல்வது என்ன?

ராமபிரானின் அருளுக்கு பாத்திரமாக வேண்டும் என்பது அணிலின் விருப்பம். அதற்கு அவரது கருத்தைக் கவர வேண்டும். அருகில் பாலம் கட்டப்படுகிறது. ஆனால் அதற்காக பலம் வாய்ந்த வானரங்கள் பணி செய்கின்றன. சிறியவன், எளியவனாகிய தான் என்ன செய்து விட முடியும் என்று அணில் திகைத்தது. எனினும் தனது சக்திக்கு இயன்ற வரையில் செய்ய முடிவு செய்து அப்பாலம் கட்ட மணலை, (சிறு கூழாங் கற்களை) ஒட்டிக் கொண்டு வந்து உதிர்த்தது. சிறிய உதவிதான். எனினும் அப்பாலத்தின் உருவாக்கத்தில் அணிலின் மணலும் சேர்ந்துள்ளது. அணில் காலத்தே செய்த உதவி ராமனின் மனதை ஈர்த்தது. அவர் அன்புடன் அணிலை தடவிக் கொடுத்து அதற்கு அருள் பாலித்தார். அணிலின் முதுகில் உள்ள மூன்று கோடுகள் அதற்கு ராமர் அணிவித்த தங்கப் பதக்கமாக இன்றும் காட்சி தருகிறது. இறைவனின் அருளைப் பெற்றதும், சமகாலத்தில் கண்ணெதிரே வாழ்வதுமான ஓர் உயிரினத்திற்கு இந்த சிறு அணிலும் ஒரு சான்று. முதுகில் மூன்று கோடுகள் உள்ள அணில்கள் ராமனின் அருளையும், அன்பையும் பெற்றவையாக போற்றப்படுகின்றன. அணில் 'பிள்ளை' என்று பாசமுடன் அழைக்கின்றோம்.

எளியவனின் சிறு உதவி என்றாலும் அது காலத்தே செய்யும் உதவியாக இருப்பின், மிகப் பெரியது. அதை போற்ற வேண்டும். மறந்து விடக் கூடாது. உதவி செய்தோருக்கு தக்க சமயத்தில் மறு உதவி செய்யவும் தயங்கக் கூடாது.

ஆனால் இந்தக் காலத்தில் யார் இப்படிப்பட்ட கதை பற்றி கவலைப் படுகிறார்கள் ? கேட்டு கேட்டு உதவிகளை வலியப் பெற்று, பலன் அடைந்தவுடன், உடனடியாக அதை மறந்தும் விடுகிறர்கள். உதவி செய்தவரை எங்கோ பார்த்தது போல் பார்க்கும் கொடுமையும் நடக்கிறது. ஏறி வந்த ஏணியை எட்டித் தள்ளி விடுகிறார்கள். இன்னும் சில நேரங்களில் உதவி செய்தவனுக்கு சுயநலம் கருதி உபத்திரவம் செய்யவும் தயங்குவதில்லை. கொடுமையிலும் கொடுமை இதுவன்றோ..?

"வலியவனோ, எளியவனோ அவன் யாராக இருந்தாலும் எங்களுக்கு கேட்க மட்டும்தான் தெரியும். வாங்கியாச்சுன்னா அவ்வளவுதான்.., நீ யாரோ.. நான் யாரோ.. " என்று சொல்லும் கூட்டம்தான் இந்த உலகில் அதிகம் நடமாட்டம் செய்கிறது.

இப்படி கூட சொல்லலாம்...

அதாவது, இராமாயணத்தில் ராமர் ஒரு மானுட அவதாரம். அப்படி ஒரு மனிதன் ஒரு நெருக்கடியில், தேவையில் இருந்த போது அவருக்கு அணில் உதவியது. அத்துடன் குரங்கு, ஜடாயு போன்ற மற்ற உயிரினங்களும் உதவின. அப்படி மற்ற உயிரினங்களே உதவும் போது ஒரு மனிதன் துன்பத்தில், தேவையில் இருக்கையில், மற்றொரு சக மனிதன் அவனுக்கு பெரிய உதவி செய்யாது போனாலும் அணிலைப் போல சிறு துரும்பையாவது தூக்கிப் போடலாம். சில ஆறுதல் வார்த்தைகள் கூட போதும். அதே போன்று செய்த உதவிக்கு ராமன் அணிலுக்கு கொடுத்த அங்கீகாரம் மிகப் பெரியது. அவ்வளவு பெரிதாக இல்லாது போனாலும், இந்த மனிதப் பிறவியினர் செய் நன்றி மறக்காமலாவது இருந்தால் நன்று.

செய் நன்றி கொன்றவருக்கு இப்பிறப்பில் மட்டுமல்ல எப்பிறப்பிலும் உய்வில்லை !

சீனாவில் ஒரு வினோத ஜந்து - படங்கள்

2011-12-22T01:37:00.001+05:30

சீனாவில் ஒரு கிராமத்தில் திடீரென ஒரு வினோத ஜந்து (அல்லது விலங்கு) அங்கிருக்கும் வீடுகளில் நுழைந்து மக்களை பயமுறுத்தியது. மிரட்டும் பெரிய கண்கள், சிறிய உருவம், தலையில் முடி இல்லை என அது விசித்திரமாக உள்ளது. அதன் முகத்தை பார்த்தால் மட்டும், அது குரங்கு இனத்தை சார்ந்ததாக தெரிகிறது. அதை பழத்தாசை காட்டி ஒருவர் லாவகமாக பிடித்து விட்டார். தற்போது அது குரங்கு இனத்தின் ஒரு வகையா என்பதை விலங்கியல் ஆராய்ச்சியாளர்கள் ஆராய்ந்து வருகின்றனர்.

அந்த வினோத 'ஏலியனின்' படங்களை பார்த்தால் உங்களுக்கு விவரம் புரியும்.

"தட்கல்" பயணச் சீட்டை இரத்து செய்தால், பயணக் கட்டணத்தை திரும்பத் தர வேண்டும் !

2011-12-20T23:28:00.001+05:30

பேருந்து கட்டண உயர்வின் எதிரொலியாக அனேகம் பேர் தொடர்வண்டியில் பிரயாணம் செய்ய ஆர்வம் காட்டி வருகின்றனர். இப்போதைய பேருந்து கட்டணத்தைக் காட்டிலும் தொடர்வண்டி கட்டணம் மிகக் குறைவாக தெரிகிறது. எனவே கூட்டம் அலைமோதுகிறது. முன்பதிவு செய்தாலொழிய பயணச் சீட்டோ, அமர இடமோ கிடைப்பதில்லை.

'தட்கல்' முறையில் பயணச் சீட்டு வேண்டுமெனில் இரண்டு நாட்களுக்கு முன்பே முன்பதிவு செய்ய வேண்டும். இது முன்பு இருந்த விதி. தற்போது கடந்த நவம்பர் 11-ஆம் தேதி முதல், பயணம் செய்வதற்கு முதல் நாளில்தான் தட்கல் பயணச் சீட்டு வழங்கப்படும் என்று தொடர்வண்டி நிருவாகம் அறிவித்துள்ளது. அதாவது தொடர்வண்டி கிளம்பும் தேதிக்கு ஒரு நாளுக்கு முன்பாக மட்டுமே தட்கல் சீட்டு வழங்கப்படும். சுருங்கச் சொன்னால் முன்பதிவானது, 48 மணி நேரங்களுக்கு முன்பு என்பது தற்போது 24 மணி நேரங்களுக்கு முன்பு என்று ஆக்கப் பட்டுள்ளது.

ஒரு தொடர்வண்டி அதன் தொடக்க நிலையத்தில் இருந்து அடுத்தமாதம் இரண்டாம் தேதி புறப்படுகிறது என்றால், அதற்கான தட்கல் பயணச் சீட்டு வழங்கும் நேரம் அதற்கு முந்தைய தினமான 1-ஆம் தேதி காலை 8 மணிக்கு தொடங்குகிறது. முந்தைய நடைமுறைப்படி இரண்டு நாட்களுக்கு முன்பே தட்கல் சீட்டு பெறலாம் என்ற நிலை இருந்த போது, ஒரேடியாக அனைவரும் கணினியில் குவிந்து பதிவு செய்தனர். (அச்சமயம் தொடர்வண்டி நிருவாக இணையத்தளம் கூட சட்டென திறக்காமல் சண்டித்தனம் செய்யும்.) இதனால் விரைவில் எல்லா சீட்டுகளும் தீர்ந்து, இடத்திற்கான மறு வாய்ப்புக்கு வழி இல்லாமல் போனது. தற்போது இந்த மறு வாய்ப்பு, தினம் தினம் பயணிகளுக்கு கிட்டியுள்ளது. இது பயணிகளுக்கு கிடைத்துள்ள உள்ளபடியான வசதி என்று எனக்குத் தோன்றுகிறது. (இதில் மாற்றுக் கருத்து ஏதும் இருந்தால் கருத்துரை இடலாம்.)

அதே நேரம் இங்கு மற்றொரு சங்கதியையும் அலச வேண்டியுள்ளது. அதாவது தட்கல் முறையில் பயணச் சீட்டு பெற்று, அதை இரத்து செய்தால் பயணக் கட்டணம் திரும்பத் தரப்படமாட்டது. இது தொடர்வண்டி நிருவாகத்தின் வணிகச் சுற்றறிக்கை கூறும் விதி. இதில் எனக்கு ஆரம்பத்தில் இருந்தே உடன்பாடு இல்லை.

சாதாரண முன்பதிவு சீட்டை இரத்து செய்தால் எப்படி கட்டணம் திரும்பத் தரப்படுகிறதோ, அவ்வாறே தட்கல் சீட்டுக்கும் தரப்படவேண்டும். காரணம் தட்கல் முன்பதிவு முறையில் முன்பதிவு செய்தவர் தனது பயணத்தை தள்ளி வைக்கிறார் அல்லது அவரால் அன்றைய தினம் பயணம் செய்ய இயலவில்லை என்றால், அவர் தனது தட்கல் பயணச் சீட்டை இரத்து செய்ய முன்வருவதில்லை. 'இரத்து செய்தால்தான் என்ன கிடைக்கப் போகிறது?' என்ற எண்ணத்தில் அப்படியே பேசாமல் இருந்து விடுவர். பெரும்பாலனோர் அதற்காக மெனக்கெடுவதில்லை. அப்போது என்ன ஆகிறது? அவருக்கடுத்து காத்திருப்போருக்கு சீட்டு கிடைப்பதில்லை. இதனால் யாருக்கு என்ன பலன்?

'தட்கல்' சீட்டை இரத்து செய்வோருக்கு, பயணக் கட்டணத்தை தொடர்வண்டி நிருவாகம் தர மறுப்பது நியாயமா?

எனவே சாதாரண பயண சீட்டை போல், தட்கல் முறை பயணச் சீட்டை இரத்து செய்தாலும், பயணக் கட்டணத்தை திரும்பத் தர தொடர்வண்டி நிருவாகம் சுற்றறிக்கை பிறப்பிக்க வேண்டும்.

என்ன சரிதானே?

முள்ளங்கி கழுவுற இடத்தைப் பாருங்க !

2011-12-11T22:59:00.000+05:30

கொடைக்கானலில் கேரட், பீட்ரூட், முள்ளங்கி என எண்ணற்ற 'இங்கிலீஷ்' காய்கறிகள் விளைகின்றன. அவற்றை மண்ணிலிருந்து பறித்து அந்த மண்ணுடனே மூட்டையாக கட்டி எடுத்து வந்து, பிறகு ஊருக்குள் மூஞ்சுக்கல் என்ற இடத்தின் வழியாக ஓடும் ஒரு ஓடை நீரில் போட்டு கழுவுகிறார்கள்.

அந்த ஓடை தண்ணீரில் அருகில் உள்ள விடுதிகளின் கழிவு நீரும் சேர்க்கிறது. அத்துடன் அங்கேயே துவைக்கவும் செய்கிறார்கள்.

பின்வரும் நிழற்படங்களில் நீங்கள் முள்ளங்கியை அவ்வாறு சுத்தம் செய்யும் விதத்தை காண்கிறீர்கள்.

முள்ளங்கியை மூட்டையுடன் தண்ணீரில் அலசுகிறார்கள். பிறகு ஒரு கூடையில் போட்டு...

மீண்டும் அலசுகிறார்கள்...

அங்கேயே துணி துவைக்கவும் செய்கிறார்கள்..

பக்கட்டில் நீர் பிடித்து....

முள்ளங்கி மீது ஊற்றுகிறார்கள்

முள்ளங்கியை 'இந்த' தண்ணீரில் வெள்ளைவெளேரென ஆக்கி மூட்டை கட்டுகிறார்கள்.

"ஹைய்யா ... நான் பச்சையா கூட தின்பேனே" என்று ஆவேசப்படாமல் காய்கறிகளை, பழங்களை சுத்தமான தண்ணீரில் கழுவி சாப்பிடுங்கள், சமையுங்கள் !

படங்கள் உதவி : ஜோதி.

எப்படி இருந்தவங்க எப்படி ஆய்ட்டாங்க பாத்தீங்களா?

2011-12-10T20:57:00.001+05:30

திருமணத்திற்கு முன்பு

(அதாவது காதலிக்கும் போது என்று வைத்துக் கொள்ளுங்களேன்)

"அவனும் அவளும்" என்ன பேசினார்கள் ?

அவன் : உம்... காத்துக்கிட்டுருக்கிறது ரொம்ப கஷ்டம்.

அவள் : நீங்க என்னை விட்டுட்டு போயிடமாட்டீங்களே ?

அவன் : இல்லை.. இல்லை.. சத்தியமா இல்லை...

அவள் : நீங்க என்னை விரும்புறீங்களா?

அவன் : நிச்சயமா..

அவள் : நீங்க என்னை ஏமாத்திடுவீங்களா ?

அவன் : மாட்டேன் .. ஏன் இப்படி கேட்டுகிட்டே இருக்கே?

அவள் : நீங்க எனக்கு ஒரு முத்தம் தருவீங்களா?

அவன் : கண்டிப்பா..

அவள் : நீங்க என்னை அடிப்பீங்களா?

அவன் : சான்சே இல்லை.. நான் அப்படிப்பட்ட ஆள் கிடையாது..

அவள் : நான் உங்களை நம்பலாமா?

அவன் : உம்..

அவள் : அன்பே....

--------------------------------------------------------------------------------------------

திருமணத்திற்கு பின்பு ...

"அவனும் அவளும்" என்ன பேசினார்கள் ?

மேலே கண்ட உரையாடலை கீழிருந்து மேலாக வாசித்துக் கொள்க !

கொஞ்சம் படிச்சிட்டு போங்க..! உங்க நல்லதுக்குதான் சொல்றேன்..!!

2011-12-10T18:42:00.001+05:30

தொலைபேசியை இடது காதில் வைத்துப் பேசவும்.

ஒரு நாளைக்கு இரண்டு முறை காபி அருந்தாதீர்கள்.

குளிர்ந்த நீருடன் (ஐஸ் வாட்டர்) மாத்திரைகளை உட்கொள்ள வேண்டாம்.

மாலை 5 மணிக்கு பிறகு வயிறு புடைக்க உண்ண வேண்டாம்.

எண்ணெய் அதிகம் கலந்த உணவு வகைகளை கண்டிப்பாக குறைத்துக் கொள்ளவும்.

காலைப் பொழுதில் இயன்றவரை அதிகமாக நீர் அருந்தவும். இரவில் குறைத்துக் கொள்ளவும்.

காதொலிப்பானை (earphone/headphone) நீண்ட நேரம் பயன்படுத்த வேண்டாம்.

இரவு 10 மணிக்குள் படுக்கச் செல்வதும், காலை 6 மணிக்குள் எழுந்து விடுவதும் நல்லது.

படுப்பதற்கு முன் மாத்திரை உட்கொண்டால், அதன் பின் உடனடியாக கீழே தலை சாய்த்து படுத்து விடாதீர்கள்.

உங்கள் செல்பேசியில் உள்ள பாட்டரி மின்சாரத்தின் அளவு கடைசிக் கோட்டில் இருக்கும் போது வரும் அழைப்புகளை எடுத்துப் பேச வேண்டாம். ஏனெனில் அச்சமயத்தில் உண்டாகும் கதிர் வீச்சு சாதாரண சமயத்தை விட 1000 மடங்கு அதிகமாக இருக்கும்.

பிரிந்த தம்பதியினரை சேர்த்து வைக்க நீதிபதி கையாண்ட வைத்தியம்

2011-12-09T20:17:00.001+05:30

"எங்கள் குடும்ப நீதிமன்றங்களுக்கு உப்புசப்பில்லாத ஏராளமான வெட்டி வழக்குகள் வருகின்றன" என்று கவலையுடன் கூறும் நீதிபதிகளுக்கு 'பிரியாணி மற்றும் ஐஸ்கிரீம்' முறை தீர்வு பற்றி கூறுகிறார் போபால் குற்றவியல் நடுவர் (மாஜிஸ்டிரேட்) திரு. கங்காசரண் தூபே.

தம்பதிகள் ஏன் பிரிகிறார்கள் ?

இந்த நீதிபதி பிரிந்து போகவிருந்த ஒரு தம்பதியினரை பிரியாணி கொண்டும், மற்றொரு தம்பதியினரை ஐஸ்கிரீம் கொண்டும் சேர்த்து வைத்திருக்கிறார். இவர், தம்பதிகளுக்குள் தகராறு என்பது மிகச் சிறிய (ஒன்றுக்கும் பெறாத) பிரச்சனைகளில் இருந்தே பூதாகரமாக கிளம்புகின்றன என்று தாம் நம்புவதாக கூறுகிறார்.

குடும்ப வழக்குகளை தீர்ப்பதில் குற்றவியல் நடுவர் கங்காசரண் தூபேவின் அணுகுமுறை மிகச் சாதாரணமானது, வெகு இயல்பானது. இவர் அண்மையில் தீர்த்து வைத்த மூன்று வழக்குகள் இதற்கு எடுத்துக்காட்டுகளாகும்.

'பிரியாணி வழக்கு':

இந்த வழக்கில், தன்னை கொடுமை செய்த குற்றத்திற்காக விமான ஓட்டியாக இருக்கும் தனது கணவனை குடும்ப வன்முறையில் இருந்து பெண்களை பாதுகாக்கும் சட்டத்தின் கீழ் கைது செய்ய வேண்டும் என்று ஓரளவு வசதி படைத்த 22 வயது பெண் ஒருவர் புகார் செய்கிறார். 2009-ஆம் ஆண்டில் திருமணம் செய்து கொண்டிருந்த இத்தம்பதியினர் திருமணம் முடிந்த சில வாரங்களுக்குள்ளாகவே பிரிந்து விட்டனர்.

இந்த வழக்கு அண்மையில் குற்றவியல் நடுவர் தூபே தலைமை வகித்த மக்கள் மன்றத்தின் (லோக் அதாலத்) முன் விசாரணைக்கு வந்தது. அப்போது அப்பெண் கொடுத்திருந்த புகாரை தூபே பரிசீலனை செய்தார். சுமார் 10 பக்கங்களில் இருந்த அப்புகாரில், கொடுமை, தாம்பத்திய உரிமைகளை தர மறுத்தல், வரதட்சணை கோரிக்கை என கிட்டத்தட்ட எல்லாவற்றையும் அப்பெண் சகட்டுமேனிக்கு எழுதித் தள்ளி இருந்தார்.

புகார் குறித்து தூபே விசாரிக்கும் போது, முதலிரவின் போது தனது கணவனுக்கு ஒரு பெண் நண்பரிடம் இருந்து தொலைபேசி வந்தது என்றும், அதை தான் ஆட்சேபணை செய்ததாகவும் அப்பெண் கூறினார். மேலும் தேனிலவுக்காக பாங்காக் செல்லும் வழியில் வேறு சில பெண் நண்பர்களிடம் இருந்து தந்து கணவனுக்கு இரண்டு தொலைபேசி அழைப்புகள் வந்தன என்றும், எனவே பாதி வழியில் திரும்பி விட்டதாகவும், பின் தனது கணவன் அசாமில் உள்ள தனது பணியிடத்திற்கு சென்று விட்டதாகவும், தான் போபாலில் உள்ள தனது பெற்றோர் வீட்டுக்கு வந்து விட்டதாகவும் அப்பெண் கூறினார். தனது புகாரில் உள்ள வேறு சில விஷயங்கள் பற்றி தனக்கு சரியாகத் தெரியாது என்றும், ஆனால் அதில் உள்ள கையெழுத்து தன்னுடையதுதான் என்றும் அவர் மேலும் கூறினார்.

இந்த தம்பதியினர் இடையே உள்ள பிரச்சனை அற்பமானது என்பதை அறிந்த நீதிபதி தூபே, "உங்கள் கணவரை நீங்கள் எங்கு முதலில் சந்தித்து, என்ன சாப்பிட்டீர்கள்" என்று அப்பெண்ணிடம் வினவினார். மேலும் அவர்கள் இருவரையும் ஒரு நாள் மாலை வேளையில் அதே இடத்திற்கு சென்று, முன்பு சாப்பிட்ட அதே உணவை சேர்ந்து சாப்பிடும்படி ஆலோசனை வழங்கினார். அந்த நேரத்தில் அவர்கள் இருவரும் அந்த நேரத்தில் 'கோழி பிரியாணி' சாப்பிட்டதாக ஒரே குரலாக கூறினார்.

இதை அடுத்து அத்தம்பதியினர் போபாலில் உள்ள புகழ் பெற்ற Bada Talaab - ஐ நோக்கி உள்ள Noor-us-Sabah என்ற உணவகத்திற்கு சென்று, கோழி பிரியாணி உண்டனர். இந்த இடம்தான் அவர்கள் தங்கள் திருமணதிற்கு முன் முதலில் சந்தித்த இடமாகும். அவர்களை நீதிமன்ற பணியாளர் ஒருவர் தூரத்தில் இருந்து கவனித்துக் கொண்டிருந்தார்.

என்னே வியப்பு ! அடுத்த நாள் அப்பெண் நீதிமன்றத்திற்கு வந்து தான் தனது கணவர் மீது கொடுத்திருக்கும் வழக்கை திரும்பப் பெற விளைவதாக (வாபஸ்) கூறினார். மேலும் தங்கள் இல்வாழ்க்கை உறவுக்கு மீண்டும் ஒரு வாய்ப்பு கொடுக்க விரும்புவதாகவும் கூறினார்.

குடும்ப வன்முறையில் இருந்து பெண்களை பாதுகாக்கும் சட்டம், 2005-இன் பிரிவு 28-ஆனது, வழக்குகளை முடிக்க தங்கள் சொந்த நடைமுறைகளை வகுத்துக் கொள்ள நீதிபதிகளுக்கு அதிகாரம் வழங்குகிறது என்று தனது சட்டப் படிப்பின் போது தங்க பதக்கம் வென்ற நீதிபதி தூபே கூறுகிறார்.

'ஐஸ் கிரீம்' வழக்கு:

இந்த வழக்கில் இளம் குழந்தைக்கு தாயாக உள்ள ஒரு பெண்ணின் வழக்குரைஞர்கள் அவரது கணவனுக்கு எதிராக சித்திரவதை, கொடுமை, துர்நடத்தை, மேலும் பல கடுமையான குற்றச்சாட்டுக்களை அதே குடும்ப வன்முறை சட்டத்தின் கீழ் முன் வைக்கின்றனர். இதன் பொருட்டு அப்பெண்ணை நீதிபதி தூபே விசாரணை செய்தார். அப்போது அப்பெண்ணுக்கு ஐஸ்கிரீம் மீது கொள்ளைப் பிரியம் உள்ளதையும், அதை அவரது கணவர் வாங்கித் தர மறுப்பதையும் பெருங் குறையாக கூறினார். கணவரிடம் விசாரித்த போது, "தனது மனைவி குழந்தைக்கு தாய்ப் பால் கொடுத்து வருவதால், அவர் ஐஸ் கிரீம் சாப்பிட்டால் அதனால் குழந்தைக்கும் சளி பிடிக்க வாய்ப்பு உண்டு என்றும், எனவே தான் ஐஸ் கிரீம் வாங்கித் தரவில்லை என்றும்," அவர் தனது தரப்பு நியாயத்தை சொன்னார்.

இதற்கு நீதிபதி தூபே என்ன ஆணையிட்டார் தெரியுமா? "ஒரு வார காலத்திற்கு தினமும் மாலை வேளையில் கணவர் தனது மனைவியை நகரின் பல்வேறு ஐஸ்கிரீம் பார்லர்களுக்கு அழைத்துச் சென்று மனைவிக்கு ஐஸ் கிரீம் வாங்கித் தந்து, அதற்கான பில்களை நீதிமன்றத்தில் தாக்கல் வேண்டும்" என்று ஆணையிட்டார்.

ஏழு தினங்கள் சென்றன. கணவன் - மனைவி இருவருக்கிடையேயும் இருந்த கருத்து வேற்றுமை மறைந்து போனது. பல்வேறு பயங்கர குற்றச் சாட்டுகளை உள்ளடக்கிய தனது புகார் மனுவை மனைவி திரும்ப பெற்றுக் கொண்டார். விடயம் முடிந்தது.

'சந்நியாசி' வழக்கு :

ஒரு மனைவி முதலிரவின் போது "உங்களை திருமணம் செஞ்சுகிட்டதுக்கு பதிலா நான் பேசாம போலீஸ் வேலைக்கே போயிருக்கலாம்" என்று தனது கணவனிடம் கூறுகிறார். இதனால் மனமுடைந்த கணவன் சந்நியாசி ஆகி விடுகின்றார். சில ஆண்டுகளுக்கு அவர் எங்கிருக்கிறார் என்பதே யாருக்கும் தெரியவில்லை. பின் ஒரு நாள் மதுராவில் காவி உடை தரித்து அவர் சந்நியாசியாக வாழ்ந்து கொண்டிருப்பது தெரிய வருகிறது. இவர்கள் வழக்கு நீதிமன்றத்திற்கு வந்த போது, தான் சம்சார வாழ்வைத் துறந்து விட்டதாகவும், சந்நியாசி ஆகி விட்டதாகவும் கணவர் கூறினார். நிலையை ஆராய்ந்த நீதிபதி தூபே, முதலில் அவரை சம்சார வாழ்வை அனுபவிக்கும்படியும், அதற்கு நன்கு முடி வெட்டிக் கொண்டு, ஜீன்ஸ் பண்ட், டீ சர்ட் போட்டுக் கொண்டு வரும்படியும் கூறினார். இவ்வாறு வந்த அவரிடம், நீதிபதி தூபே தனது பைக்கை கொடுத்து, "உங்களை கட்டிக்கிட்டதுக்கு பதிலா போலீஸ் வேலையில் சேர்ந்து இருக்கலாம்" என்று கூறிய அவரது மனைவியுடன் உல்லாசமாக ஒரு ரவுண்டு அடித்து விட்டு வரும்படி கூறினார். பல ஆண்டுகள் பிரிந்து இருந்த அத்தம்பதி இந்த மோட்டார் பைக் ரவுண்டுக்கு பிறகு, தாங்கள் தாங்கள் குடும்ப வாழ்வை ஒரு புதிய உற்சாகத்துடன் தொடங்க விரும்புவதாக கூறினார், என்கிறார் நீதிபதி தூபே.

நீதிபதி தூபே முன் வைக்கும் கேள்விகள் :

இவ்வாறு குடும்ப பிரச்சனைகளின் வேரைக் கண்டறிந்து அதை எளிய முறையில் தீர்த்து வைக்கும் நீதிபதி திரு. கங்காசரண் தூபே, "வழக்குரைஞர்களும் காவலர்களும் விரிவானதும் புனைவானதுமான குற்றப்பத்திரிக்கைகளை தயார் செய்து ஏன் குடும்பத்தை பிரிப்பவர்களாக செயல்பட வேண்டும்?" என்று கேட்கிறார்.

மேலும் "ஊழல், குற்ற நடத்தை போன்ற மிகக் கடுமையான வழக்குகளை விசாரிக்க நீதிமன்றங்களுக்கும், நீதித்துறைக்கும் அதிக நேரமும் கவனமும் தேவைப்படுகிறது. அப்படி இருக்கும் போது இப்படிப்பட்ட ஒன்றுக்கும் பெறாத அற்ப வழக்குகளை விசாரணை செய்வதில் அவை ஏன் தாங்கள் நேரத்தை செலவிட வேண்டும் ?" என்றும் அவர் வினவுகிறார்.

இப்படிப்பட்ட நீதிபதிகள் இன்றைய காலகட்டத்திற்கு இன்றியமையாதவர்கள். இத்தகு அணுகுமுறை குடும்ப வழக்குகளில் தரப்பினர்களின் மனதை மாற்றும்.

நிற்க:

வஞ்சக மனைவிகள் :

நீதிபதி தூபே அவர்களின் தீர்வு முறை உள்ளபடியே பாராட்டப்பட வேண்டிய ஒன்று. ஆனால் அதே நேரத்தில் சம்பந்தப்பட்ட தம்பதியினரிடையே கொஞ்சமாவது அன்பு அல்லது பாசம் அல்லது மன்னிக்கும் தன்மை என்பது ஒட்டிக் கொண்டிருக்க வேண்டும். அப்போதுதான் இந்த தீர்வு முறை வேலை செய்யும். மாறாக, எப்போது சமயம் கிடைக்கும், எப்போது கைவரிசையை காட்டி ஆதாயம் தேடலாம் என்று 'செட்டு' சேர்த்துக் கொண்டு காத்துக் கொண்டிருக்கும் வஞ்சக, மோசடி மனைவிகளுக்கு இந்த அணுகுமுறை வேலை செய்யுமா? நிச்சயம் செய்யாது.

அச்சுறுத்தும் மனைவிகள் :

இ.த.ச. பிரிவு 498ஏ அல்லது குடும்ப வன்முறை சட்டம் அல்லது வேறு குற்ற சட்டப் பிரிவுகளை முன்னிறுத்தி, கணவனையும், அவரது குடும்பத்தினரையும் அச்சுறுத்தி, நிறைய தொந்தரவுகளை கொடுத்து, வலுக்கட்டாயப்படுத்தி, அவமானப்படுத்தி ஒரு பெருந்தொகையுடன் பரஸ்பர மணமுறிவு எனும் சமரசத்திற்கு இழுக்கும் மனைவிகளிடம் இந்த வைத்தியம் பலிக்காது.

காரணங்களை புனையும் ஏமாற்று மனைவிகள் :

இ.த.ச. பிரிவு 498ஏ -இன்படி ஒரு புகார் இருக்க வேண்டுமா? அதற்கு இதெல்லாம் நடந்திருக்க வேண்டும் என்று ஒரு பட்டியல் உள்ளது. இவற்றை கொண்டு குடும்ப வன்முறை சட்டத்திலும் புகார் செய்யலாம். ஆரம்பத்தில் 5 வகையான உரிமையியல் தீர்வழிகளை கொடுக்கும் சட்டமாக இருந்த இச் சட்டம் இப்போது மெல்ல மெல்ல முற்றிலும் குற்றவியல் நடவடிக்கை சட்டமாக மாறி வருகிறது. இச்சட்டப் பிரிவு அல்லது சட்டத்திற்கு பொருந்தும் வகையில் காரணங்களை ஜோடிப்பது ஒரு "குடும்ப பெண்ணுக்கு" மிக எளிது. உடனே சட்டமானது, கணவன் மற்றும் அவரது குடும்பத்தினர் மீது பாய்ந்து விடும். இப்படி பாய வைத்து, வாழ்க்கை பொருளுதவித் தொகை அல்லது நிரந்திர பிரிமனைப் பணம் என்ற பெயரில் பணம் பறிக்கும் மனைவிகளிடம் மேற்கண்டவாறான பஞ்சாயத்துகள் எடுபடுமா?

திட்டமிடும் சதிகார மனைவிகள் :

முன்னரே திட்டமிடும் இத்தகு மனைவிகள் முதலில் ஆலோசனைக்கு தேடுவது ஒரு நல்ல, தேர்ந்த குடும்ப வழக்கு வழக்குரைஞர். அவரது ஆலோசனைபடி காரணங்களை சோடித்தல். இதற்கு நடுவே கணவனுக்கு வேண்டியவர்கள், வேண்டாதவர்கள் என்று பட்டியல் தயாரித்து அவர்களில் தனக்கு தோதானவர்களிடம் உறவாடல். இவர்களை வழக்கிட்ட பிறகு மெல்ல ஒவ்வொரு சீட்டாக களமிறக்க மனைவிக்கு உதவும். மொத்த நடவடிக்கைக்கும் ஒரு மிகப் பெரிய மாஸ்டர் பிளான். அதற்கு சதி.

கபட நாடகம் ஆடும் மனைவிகள் :

இவ்வாறு ஏமாற்ற நினைக்கும் மனைவிகள் திடீரென வீட்டை விட்டு ஓடிப் போவர்கள் அல்லது ஏதோ காரணம் ஒன்றை சொல்லி பெற்றோர் வீட்டில் போய் அமர்ந்து கொண்டு புகார் அல்லது வழக்கு போடுவார்கள். இதற்கு முன் இவர்களது நடவடிக்கைகள் பலவும் விசித்திரமாக இருக்கும். இயல்பானதாக இருக்காது. அடிக்கடி செல்பேசியில் உரையாடிக் கொண்டு இருப்பார்கள். ஏதோ காரணம் சொல்லி விட்டு வெளியே சென்று விட்டு வருவார்கள். அதாவது தனது பிந்தைய திட்டத்திற்கு அடித்தளம் இடுகிறார்கள் என்று பொருள். கணவனை தவறு செய்யத் தூண்டுவார்கள். கோபமூட்டுவர்கள், பேச வைப்பார்கள். "இதெல்லாம் எனக்கும் ரொம்ப பிடிக்கும்" என்று சொல்லி விட்டு, புகாரில் "அவர் அப்படி செய்யச் சொல்லி என்னை கட்டாயப்படுத்தினார்" என்று கதை அளந்து வைத்திருப்பார்கள்.

தனது குடும்பத்தினருடன் சேர்ந்து கொண்டு பல்வேறு கபட நாடகம் ஆடுவார்கள். இன்று நிழற்படம் எடுப்பதும், உரையாடல்களை பதிவு செய்வதும் செல்பேசி காரணமாக மிக எளிதாகிவிட்டது. எனவே கணவன் அறியாமல் எல்லாம் பதிவாகிக் கொண்டிருக்கும், கஷ்ட காலம். (ஆனால் வழக்கு நடந்தால் மனைவி மாட்டிக் கொள்வர் என்பது வேறு விஷயம் !).

எனவே மனைவின் நடவடிக்கைகள் விசித்திரமானதாக, விபரீதமானதாக இருந்தால் எச்சரிக்கையுடன் இருப்பது நன்று.

பிரிவு 498A, உச்ச நீதிமன்றம், இந்திய சட்ட ஆணையம் :

இ.த.ச. பிரிவு 498A -இன் கீழான புகார்களில் உண்மை இருப்பதில்லை, அதை மனைவிமார்கள் உள்நோக்கம் கருதி தவறாக பயன்படுத்துகின்றனர் என்று நமது மாண்பமை உச்ச நீதிமன்றம் Preeti Gupta v. State of Jharkhand (decided on August 13, 2010) and Ramgopal v. State of M.P. (Order dated July 30, 2010) என்ற இரு வழக்குகளில் கருத்துரைத்தது. மேலும் இந்த சட்டப் பிரிவின் கீழான புகார் மனுக்களை தரப்பினர்கள் சமரசம் செய்து கொள்ளும் வழக்காக (Compoundable) ஆக்க வேண்டும் என்று இந்திய சட்ட ஆணையத்திற்கும் பரிந்துரை செய்தது. இது குறித்த கேள்வி ஒன்றுக்கு சட்டம் மற்றும் நீதிக்கான அமைச்சர் திரு சல்மான் குர்ஷித் மக்களவையில் நேற்று எழுத்துப் பூர்வமான பதில் அளிக்கையில், மேற்கண்ட வழக்குகளில் உச்ச நீதிமன்றம் கூறிய கருத்துகளை இந்திய சட்ட ஆணையம் பரிசீலித்துள்ளது என்றும், அது பெற்ற தகவலின்படி, இரு இலட்சத்திற்கும் மேலான பிரிவு 498A -வழக்குகள் நிலுவையில் உள்ளன என்றும், கடந்த 31-10௦-2011-ஆம் தேதி நடந்த கூட்டத்தில் பிரிவு 498A - தொடர்பான விடயங்கள் விவாதிக்கப்பட்டன என்றும், அதன் அடிப்படையில் சட்ட ஆணையம் அறிக்கை தயாரிக்கும் என்றும், அதில் பிரிவு 498A -கீழான குற்றத்தை 'சமரசம்' செய்து கொள்ளும் குற்றமாக ஆக்க வேண்டியதின் அவசியத்தை விளக்கியுரைக்கும் என்றும் கூறினார். மேலும் அந்த அறிக்கையானது பிரிவு 498A -தொடர்பான இதர சங்கதிகளை அதாவது அதை பிணைவிடு குற்றமாக ஆக்குதல், கைது செய்யும் நடைமுறை, சமரசத் தீர்வு போன்றவற்றையும் விளக்கும் என்றும் அவர் தனது பதிலில் கூறினார்.

முடிவாக:

கடந்த மாதம் ஆண்கள் தினம் வந்தது. அதற்காக சென்னையில் ஒரு கூட்டம் ஏற்பாடு செய்யப்பட்டது. பொய் வழக்குகளால் பாதிக்கப்பட்ட கணவன்மார்கள் திரளாக கலந்து கொண்டிருந்தனர். அதில் பேசப்பட்ட பல்வேறு விடயங்களில் ஒரு விடயம் பரிசீலனைக்குரியது. அதாவது பிரிவு 498A -இன் கீழ் வழக்கிடும் மனைவிகள் கணவனுக்கு எதிராக குற்றத்தை மெய்ப்பிக்கத் தவறினால், கணவன் மீது பொய் வழக்கிட்ட குற்றத்திற்காக அம்மனைவிக்கும், அவரது பெற்றோருக்கும் பாதி சிறைத் தண்டனையாவது நீதிமன்றம் அதே நடவடிக்கையில் வழங்க வேண்டும் என்றும், அப்போதுதான் கணவனையும், அவரது குடும்பத்தினரையும் குற்றவியல் வழக்கு கொண்டு இம்சை செய்து பெருந் தொகை பறிக்க திட்டமிடும் மனைவிகள் திருந்துவர், பொய் வழக்கிட தயக்கம் காட்டுவார் என்றும் பேசப்பட்டது.

இது நடக்குமா என்பது ஒரு புறம். அதே நேரம் குறைந்தபட்சம் பிரிவு 498A -இன் வகைமுறைகளை மனைவிக்கும், அவரது குடும்பத்தினருக்கும் பொருந்தும் வண்ணம் மாற்ற வேண்டும். அதாவது அப்பிரிவில் வரும் 'கணவன் அல்லது அவரது உறவினர்' என்பதை 'இல்வாழ்க்கை துணை அல்லது அவரது உறவினர்' என்று மாற்றினால் அதுவே கூட போதுமானது. இந்த மாற்றத்தை பெண்கள் தொடர்பான அத்தகு எல்லா சட்டங்களிலும் கொண்டு வரவேண்டும். அப்போதுதான் சட்டத்தின் முன் கணவனும் மனைவியும் சமம் என்பது நிலை நிறுத்தப்படும்.

"தமிழ் கம்ப்யூட்டர்" இதழுக்கு நன்றி ! - வலைப்பதிவர்களுக்கு கிடைக்கும் பயன் என்ன?

2011-12-03T14:41:00.002+05:30

இந்த வலைப்பதிவின் வாயிலாக நான் 100 பதிவுகளை எழுதி முடித்தமைக்கு வாழ்த்துகளை வேண்டி "இது என் 100-வது பதிவு ! வாழ்த்துகளை வேண்டுகிறேன் !!" என்ற தலைப்பில் கட்டுரை ஒன்றை எழுதி இருந்தேன். அதில் நான் எனது நன்றிகளை தெரிவித்துக் கொண்டதோடு மட்டுமல்லாமல், "வலைப்பதிவில் எழுதுவதால் ஒரு வலைப்பதிவாளருக்கு என்ன பயன்?" என்ற தலைப்பில் சில விடயங்களை பகிர்ந்து கொண்டிருந்தேன்.

அதை சென்னையிலிருந்து மாதமொருமுறை வெளிவரும் "தமிழ் கம்ப்யூட்டர்" என்ற இதழ் பிரசுரம் செய்துள்ளது. மேலும் நான் எழுதிய "அடேங்கப்பா எவ்வளவு பெரிய 1 GB ?" என்ற குறுங்கட்டுரையை பெட்டி செய்தியாக இந்த பிரபல இதழ் வெளியிட்டுள்ளது.

கணினி, வலைத்தளம், மென் மற்றும் வன் பொருள் தொடர்பான பல்வேறு பயன் மிகு செய்திகள், தகவல்கள், கட்டுரைகளை வெளியிட்டு வரும் "தமிழ் கம்ப்யூட்டர்" இதழுக்கு எனது கட்டுரையை வெளியிட்டமைக்காக என் நெஞ்சார்ந்த நன்றிகளை தெரிவித்துக் கொள்கின்றேன்.

பயன் தரும் இந்த இதழுக்கு சந்தாதாரராக சேர பின்வரும் முகவரிக்கு தொடர்பு கொள்ளலாம்.

தமிழ் கம்ப்யூட்டர்,

37, அசீஸ்முல்க் இரண்டாம் தெரு,

அண்ணாசாலை, ஆயிரம் விளக்கு,

சென்னை - 600 006.

நன்றி ! நன்றி !! நன்றி !!!

இதைப் படிங்க.. மனசு விட்டு சிரிங்க..

2011-11-28T14:29:00.002+05:30

செருப்பு இல்லாம நாம நடக்கலாம்;

ஆனா நாம இல்லாம செருப்பு நடக்க முடியாது.

_____________________________________________

என்னதான் மனுசனுக்கு வீடு, வாசல், காடு, கரைன்னு எல்லாம் இருந்தாலும்,

ரயிலேறனும்னா ஃப்ளாட்பாரத்துக்கு வந்துதான் ஆகனும். இதுதான்வாழ்க்கை.

_____________________________________________

பஸ் ஸ்டாப் கிட்ட வெய்ட் பண்ணா பஸ்ஸு வரும். ஆனா

ஃபுல் ஸ்டாப் கிட்ட வெய்ட் பண்ணா ஃபுல்லு வருமா?

நல்லா யோசிங்க! குவாட்டர் கூட வராது!!!

_____________________________________________

என்னதான் பொண்ணுங்க பைக் ஓட்டினாலும்,

ஹீரோ ஹோன்டா, ஹீரோயின் ஹோன்டா ஆய்டாது!

_____________________________________________

என்னதான் பசங்க வெண்டைக்காய் சாப்பிட்டாலும்,

லேடீஸ் ஃபிங்கர், ஜென்ட்ஸ் ஃபிங்கர் ஆய்டாது!!!

______________________________________________

பஸ் ஸ்டாண்ட்ல பஸ் நிக்கும். ஆட்டோ ஸ்டாண்ட்ல ஆட்டோ நிக்கும். சைக்கிள் ஸ்டாண்ட்ல சைக்கிள் நிக்கும். ஆனா... கொசுவத்தி ஸ்டாண்ட்ல கொசு நிக்குமா??

நல்லா யோசிக்கனும்...!!

______________________________________________

இஞ்ஜினியரிங் காலேஜ்ல படிச்சா இஞ்ஜினியர்ஆகலாம். ஆனா பிரசிடன்சி காலேஜ்ல படிச்சா

பிரசிடன்ட் ஆகமுடியுமா?

______________________________________________

ஆட்டோக்கு 'ஆட்டோ'ன்னு பேர் இருந்தாலும், மேன்யுவலாத்தான் டிரைவ் பண்ண முடியும்.

______________________________________________

வாழை மரம் தார் போடும்,

ஆனா அதை வச்சு ரோடு போட முடியாது!

(ஹலோ! ஹலோ!!!!)

______________________________________________

பல்வலி வந்தால் பல்லை புடுங்கலாம்,

ஆனா கால்வலி வந்தால் காலை புடுங்க முடியுமா?

இல்லை தலைவலி வந்தால் தலையைதான்

புடுங்கமுடியுமா?

______________________________________________

பில் கேட்ஸோட பையனா இருந்தாலும்,

கழித்தல் கணக்கு போடும்போது,

கடன் வாங்கித்தான் ஆகனும்.

______________________________________________

கொலுசு போட்டா சத்தம் வரும்.

ஆனா, சத்தம் போட்ட கொலுசு வருமா?

______________________________________________

பேக் வீல் எவ்வளவு ஸ்பீடா போனாலும்,

ஃப்ரன்ட் வீல முந்த முடியாது.

______________________________________________

T Nagar போனா டீ வாங்கலாம்.

ஆனால் விருதுநகர் போனா விருது வாங்க முடியுமா?

______________________________________________

என்னதான் பெரிய வீரனா இருந்தாலும்

வெயில் அடிச்சா திருப்பி அடிக்க முடியாது.

(ஹலோ.. ஹலோ.. என்ன சார் இப்படியெல்லாம் ?)

______________________________________________

இளநீர்லயும் தண்ணி இருக்கு, பூமிலயும் தண்ணி இருக்கு. அதுக்காக, இளநீர்ல போர் போடவும் முடியாது,

பூமில ஸ்ட்ரா போட்டு உரியவும் முடியாது.

______________________________________________

உங்கள் உடம்பில் கோடிக்கணக்கான செல்கள் இருந்தாலும்,ஒரு செல்லில் கூட ஸிம் கார்ட்

போட்டு பேச முடியாது.

______________________________________________

என்னதான் நீ புது மாடல் மொபைல் வச்சிருந்தாலும்

மெஸேஜ் Forwardதான் பண்ண முடியும்,

Rewind பண்ண முடியாது.

______________________________________________

"தீவிரமாக யோசிப்போர் சங்கம்"

(எங்களுக்கு வேறுஎங்கும் கிளைகள் கிடையாது)

நன்றி : திரு. ரமேஷ்

____________________________________________________________________________________

'பேக்கு வர்மம்' பற்றி தெரியுமா ?

2011-11-26T16:51:00.011+05:30

'வர்மம்' என்பது தற்காப்பு மற்றும் மருத்துவ முறைக்கு பயனாகும் ஒரு கலையாகும். வர்மத்தில் படு வர்மம், தொடு வர்மம், நோக்கு வர்மம் என பலவகை உண்டு.

'தொடு வர்மம்' மூலம் பல கடுமையான உடல் வலிகள் குணமாக்கப்படுகின்றன. அதே நேரத்தில் தாக்க வரும் எதிரியின் சில முக்கிய நரம்பு முனை பகுதியை கையால் அழுத்திக் குத்தி பிரள வைப்பதன் மூலம் ரத்த ஓட்டத்தை தடுத்து அவனை செயலிழக்கச் செய்ய முடியும். உடனே முடக்க முடியும்.

'நோக்கு வர்மம்' பற்றி 7-ஆம் அறிவு திரைப்படத்தில் இயக்குனர் முருகதாஸ் சொல்ல நாம் அனைவரும் தெரிந்து கொண்டோம். இதற்கு முன் 'படு வர்மம்' பற்றி 'இந்தியன்' திரைப்படத்தில். 7-ஆம் அறிவில் முருகதாஸ் 'அறி துயில் நிலையை' (ஹிப்னாடிசம்) நோக்கு வர்மம் என்கிறார். அதே நேரத்தில் போதி தருமர் வாழ்க்கை வரலாறை புரட்டிப் பார்த்தால் அது முருகதாஸ் சொல்வது போல் இல்லை. அந்த முரண்பாடுகள் இந்தக் கட்டுரைக்கு வேண்டாம்.

வர்மக் கலையின் வாயிலாக நல்லதையும் செய்யலாம் . பொல்லாததையும் செய்யலாம். நல்லது செய்யும் வர்மக் கலையின் மீது என்றும் எனக்கு மரியாதை உண்டு.

Anyway, தலைப்புக்கு வருகின்றேன்..

சில காலங்களுக்கு முன் ஒரு குடும்பத்தினரைப் பற்றி ஒருவர் சொல்லக் கேட்டு அறிந்தேன்.

அந்தக் குடும்பத்தின் உறுப்பினர்களுக்கு ஒருவர் நிறைய நல்லன செய்து, உளப்பூர்வமாக உதவி செய்கிறார். அவர் நல்ல மனதோடு, வெள்ளிந்தியாக செய்து வந்த பல காரியங்களை அக்குடும்பம் ஏற்று சுபிட்சம் அடைகிறது. ஆனால் அக்குடும்பம் அவரை முடிந்த அளவு பயன்படுத்திக் கொள்கிறது என்பதையோ, காரியங்கள் முடிந்த பிறகு அவர் மீது அபாண்டமாக பழி போட்டு பணம் பறிக்கப் போகிறது என்பதையோ அவரால் அறிந்து கொள்ள முடியவில்லை. அவ்வளவு கமுக்கமாக அக்குடும்பத்தினர் இருந்து காரியங்களை சாதித்துக் கொண்டனர்.

இதற்கு அக்குடும்ப உறுப்பினர் கையில் எடுத்துக் கொண்ட ஆயுதம் எது தெரியுமா?

அது "பேக்கு வர்மம்"
(குறிப்பு : இது வர்மக்கலையில் சேர்த்தி அல்ல)

அக்கு(டு)ம்ப உறுப்பினர்கள் தங்களை 'பேக்கு' மாதிரி காட்டிக் கொண்டு காரியங்கள் சாதித்துக் கொள்வதில் வல்லவர்கள். 'அப்பாவி என்பது வேறு.. அப்பாவி போல் காட்டிக் கொள்வது' என்பது வேறு. இதில் அக்குடும்பம் இரண்டாவது ரகம். அக்குடும்பத்தினருக்கு உதவிய அந்த நல்லவர் அக்குடும்பத்தில் தங்கி இருக்கும் போது அனைவரும் 'ஒன்றும் தெரியாத அமுக்கு பாப்பாக்கள்' போல நடந்து கொள்வர். மிகப் பரிதாபமாக முகத்தை வைத்துக் கொண்டு உதவிகள் கேட்பார். இளகிய மனம் படைத்த அந்த நல்லவர் அவர்கள் கேட்டவாரெல்லாம் செய்து கொடுப்பார், நடந்து கொள்வார். அதனால் அக்குடும்பத்தினர் பெரும் பயன் அடைந்தனர்.

அக்கு(டு)ம்பத் தலைவன் ஒரு 'சைலென்ட் துரை'. குறிப்பாக தனது மகளிடம் அதிகமாக பேச மாட்டார். இருவரும் கண்களாலே 'சைகை' செய்து கொள்வர். அதில் ஆயிரம் அர்த்தங்கள் இருக்கும். அவை அந்த இருவருக்கு மட்டுமே புரியும். மற்றவர்களுக்கு சட்டென புரியாது. அந்த நல்லவருக்கும் புரியாது போனதில் வியப்பு ஏதும் இல்லை. சுருங்கச் சொன்னால் அவரை தந்தையும் மகளும் சேர்ந்து அந்த நேரத்தில் ஏமாற்றுகிறார்கள் என்று பொருள்.

அக்கு(டு)ம்பத் தலைவியை 'ஒரு அபிநய சரஸ்வதி' எனலாம். சூழலுக்குத் தக்கவாறு முகத்தில் பாவனை காட்டுவார். அவருக்கு பிடிக்கவில்லை என்றால் முகவாய்க் கட்டு இன்னும் கோனையாகிவிடும். பிடித்திருக்கிறது என்றால் உள்ளே கோணல்மாணலாக வளர்ந்திருக்கும் அத்த்தனை பற்களும் தெரிய உதடுகள் காது வரை எட்ட சத்தமில்லாமல் சிரிப்பார். விரும்பாத ஒன்று நடந்து விட்டதாக அவர் எண்ணினால் 'ஸ்...ஸ்ச் ...' என்ற சத்தம் மட்டும் கேட்கும். பல சமயங்களில் ஏறுக்குமாறாகவும் பாவனை காட்டுவார், காரியம் சாதிக்க. பாவம்..... அந்த நல்ல மனிதர் இந்த அபிநய சரஸ்வதியின் முக பாவனைகளால் பல முறை குழம்பி போய் இருக்கிறார்.

அக்கு(டு)ம்ப தலைவரின் மகள், தனக்கு சாதகமான பதிலை சிரித்துக் கொண்டே போட்டு வாங்குவதில் கில்லாடி. அவர் கேட்ட கேள்வி மற்றவர்களுக்கு தெரியாது. ஆனால் அந்த நல்ல மனிதர் சொன்ன பதில் எல்லோருக்கும் தெரியும். குரங்கிடமிருந்து தொப்பியை திரும்பப் பெற வியாபாரி, முதலில் தனது தொப்பியை தூக்கி எறிவானாம். அதை போல செய்து முதலில் ஒரு ஒத்திகை பார்த்துக் கொள்வார். அவர் ஒத்திகைக்கு செய்ததை அந்த நல்ல மனிதரும் நல்லெண்ணத்தில் செய்தார். பின் 'அது தவறு.. நீ ஏமாந்து விட்டாய்' என இன்று அவரை பரிகசிக்கின்றார். அந்த மனிதருடன் சேர்ந்து கமுக்கமாக செய்த பல காரியங்களை இன்று ஒருபுறமாக நின்று 'தவறு' என்று சொல்கிறார். ஆனால் அதெப்படி தவறாகிவிடும்? எனினும் இப்படியே அவரது நுண் உணர்வுகளை தூண்டி, சீண்டி மெல்லமெல்ல அவரை சீரழித்து வந்தார். நேரத்திற்கு தக்க கபட நாடகம் போடுவதில், ஆடுவதில் கில்லாடி. அந்த நல்லவரை எப்படியும் தவறானவராக சித்தரிக்க வேண்டும் என்று பலே திட்டங்கள் எல்லாம் போட்டார். எல்லாம் 'பேக்கு வர்ம' மயம்.

அக்கு(டு)ம்ப தலைவனின் மகன் ஒரு அசகாய பேக்கு (சூரன்). காரியம் ஆக வேண்டும் என்றால் எதையும் செய்வான். மற்றவர்கள் பேசுவதைக் கேட்டு பதில் சொல்ல மாட்டன். 'ஹு..ஹும்.. ஹு..ஹும்..' என்ற ஒரு விசித்திர முனகல் தவிர வேறு எந்த சத்தமும் அவன் வாயில் வராது. அதாவது எதிர் தரப்பினர் பேசுவதை அமோதிப்பதை போல. இப்படி 'ஹு..ஹும்.. ஹு..ஹும்..' என்று சொல்லி பின்னிட்டு தங்கள் 'கை கழுவும் திட்டத்தை நிறைவேற்ற' அந்த நல்ல மனிதரிடம் பல விடயங்களை கறந்து கொண்டான். தேவைக்கு தகுந்தாற் போன்று பல பொருட்களை இரவலாக, பரிசாக பெற்றுக் கொண்டான்.

அக்கு(டு)ம்ப உறுப்பினர் அனைவரும் நடப்பதே ஏதோ பாதம் தரையில் தொட்டும் தொடாமலும் நடப்பது போல இருக்கும். பூனை தோற்று விடும் போங்கள். மெல்ல நடந்து வந்து ஒற்றர் வேலை பார்ப்பதில் வல்லவர்கள். அதே நேரம் திடீரென மாயமாக மறைந்தும் போய் விடுவார்கள். "இங்கேதானே இருந்தார்கள்.. எங்கே போனார்கள்?" என்று நாம் தேடிக் கொண்டிருக்க வேண்டும்.

அந்த மனிதருக்கு வேண்டியவர்களிடம் அவரை அறியாமலேயே பழகி வந்துள்ளனர். தற்போது அவர்களிடம் தங்களை நல்லவர்கள் போல் காட்டிக் கொண்டு, அவரை பற்றி வெகு சாதுரியமாக குறை கூறி துவேசம் விளைவிக்கின்றனர். அவருக்கு வேண்டாதவர்களை இனம் கண்டு அவர்களிடமும் பழகினர். எதிரிக்கு எதிரி நண்பன் அல்லவா?

அந்தக் குடும்பம் இந்த நல்ல மனிதரிடம் காட்டிய பேக்கு வர்மத்தால், இன்று அவர் கிட்டத்தட்ட சிதைந்து போய் விட்டார் என்றுதான் சொல்ல வேண்டும்.

நன்றியா ? கிலோ எவ்வளவு? என்று கேட்கிறது அக்குடும்பம்.

அக்குடும்பம் இதுகாறும் வன்ம உணர்வுடன் பழகி வந்துள்ளது என்பதை அந்த நல்ல மனிதர் அறிந்து கொள்வதற்குள் எல்லாம் கை மீறிப் போய் விட்டது.

இப்படிப்பட்ட 'வர்மக் கலையை' பிரயோகிக்கும் சேறும் சகதியுமான நபர்களை அடையாளம் கண்டு விலகி இருப்பது நல்லது. இல்லாவிட்டால் முடங்கி போவது உறுதி.

நான் இறக்கின்ற போது....

2011-11-24T00:28:00.006+05:30

எனது கண்களை,

சூரிய உதயத்தையே காணாதவருக்கு கொடுங்கள்;

எனது இதயத்தை,

இதயத்தின் வலியை உணர்ந்தவருக்கு கொடுங்கள்;

எனது குருதியை,

கொடும் விபத்தில் காயம்பட்ட இளைஞனுக்கு கொடுங்கள்;

எனது சிறுநீரகங்கள்,

மற்றொருவர் உடலிலிருந்து கழிவை வெளியேற்றட்டும்;

எனது எலும்புகள்,

முடமான குழந்தையை நடக்கச் செய்வதற்கு உதவட்டும்;

என்னில் என்ன மிச்சமிருக்கிறதோ அதை எரியுங்கள்;

அந்தச் சாம்பலை மலர்ச்செடி வளர காற்றில் தூவுங்கள்;

என்னுடையது எதையாவது நீங்கள் புதைக்க வேண்டியிருந்தால்,

அது எனது தவறுகளாகவும், நான் எனது சக மனிதனுக்கு எதிராக செய்த குற்றங்களாகவும் இருக்கட்டும்;

எனது பாவங்களை பிசாசுகளுக்கு கொடுங்கள்;

எனது ஆன்மாவை ஆண்டவனுக்கு கொடுங்கள்;

நீங்கள் என்னை நினைக்க விளைந்தால்,

யாருக்குத் தேவையோ அவருக்காக கனிவான செயல் ஒன்றைச் செய்யுங்கள் அல்லது சொல் ஒன்றைக் கூறுங்கள். அதுவே என்னை நினைப்பதாகும்.

நான் கேட்டதை எல்லாம் நீங்கள் செய்வீர்களானால்,

நான் என்றும் வாழ்ந்திருப்பேன் !

- நானி ஏ. பல்கிவாலா.

சட்ட மேதை.

இது என் 100-வது பதிவு ! வாழ்த்துகளை வேண்டுகிறேன் !!

2011-11-21T10:18:00.002+05:30

இது என் 100-வது பதிவு.

வாழ்த்துகளை வேண்டுகிறேன் !

முதலில் எனது வலைப்பதிவை தொடர்ந்து வாசித்து வரும் உங்கள் அனைவரிடமும் வாழ்த்துகளை பெற விளைகின்றேன். உங்கள் வாழ்த்துகளை இந்தப் பதிவுக்கு நீங்கள் அளிக்கும் ஓட்டுகள் மூலம் சுட்டிக் காட்டினால், அதுவே கூட போதுமானது. என் மனம் நன்றியுடன் என்றும் நினைக்கும்.

நன்றி தெரிவிக்கின்றேன் !

எனது இந்த வலைப்பதிவிற்கு உறுப்பினர்களாக இதுகாறும் எழுபத்து ஏழு பேர் சேர்ந்திருக்கின்றனர். அவர்களில் பலர் மிகப் பெரும் வலைப்பதிவர்கள். கிட்டத்தட்ட ஜாம்பவான்கள் அல்லது முன்னோடிகள் என்று கூறலாம். அவர்கள் எல்லோருக்கும் இந்த வாய்ப்பை பயன்படுத்தி நன்றி தெரிவிக்க விளைகின்றேன். குறிப்பாக திருவாளர்கள் ராஜராஜேஸ்வரி ஜெகமணி, கவிதை வீதி சௌந்தர்,ரமேஷ் வெங்கடபதி, வேடந்தாங்கல் கருன், நெற்குப்பை தும்பி, ரத்தினவேல் நடராஜன், மக்சிமம் இந்தியா ஆகியோரைச் சொல்லலாம். இவர்கள் அடிக்கடி பின்னூட்டம் இட்டவர்கள் என்ற வகையில் என் நினைவில் நிற்கிறார்கள்.

அடுத்து அந்த உறுப்பினர்களில் பலர் இந்த வலைப்பதிவை தொடர்ந்து வாசித்து, அவ்வப்போது ஓட்டும், மறுமொழியும் இட்டு வருகிறார்கள். அவர்களில், வலைப்பதிவர்கள் அல்லாத பல வாசகர்கள் அடங்குவர். குறிப்பாக சொல்வதென்றால் அமைதி அப்பா, கோவை சக்தி, செல்வராசு (அன்னை மோட்டோர்ஸ்), வக்கீல் ராஜா, அண்மையில் 'ஆளுங்க' - இவ்வாறு சிலர். இவர்களுக்கும் நன்றி சொல்கின்றேன்.

உறுப்பினர்களாக சேர்ந்த வேறு சிலருடன் எனக்கு பெரிய பரிச்சயம் ஏதும் ஏற்படவில்லை. காரணம் அவர்கள் உறுப்பினர்களாக சேர்ந்த போது, அவ்வாறு சேர்ந்துள்ள விவரத்தை என்னால் தெரிந்து கொள்ள முடிந்ததே தவிர, வேறு வகையில் விவரங்களை அறிய முடியவில்லை.

மற்றபடி இந்த வலைப்பதிவை உலகெங்கிலும் உள்ள, தமிழறிந்த மக்கள் அவ்வப்போது வாசித்துக் கொண்டிருக்கினறனர் என்பதை அறிய முடிகிறது. அவர்கள் யாவருக்கும் நீங்கா நன்றிகள்.

சில வேடிக்கை அனுபவங்கள் :

நான் சில மாதங்களுக்கு முன் '' 'Disc Bulge' வலிக்கு ஒரு நிமிடத்தில் தீர்வு'' என்ற தலைப்பில் அனுபவக் கட்டுரை ஒன்றை எழுதி இருந்தேன்.அது மட்டும் இன்றளவும் தினமும் குவைத் தேசத்திலிருந்து பார்வை இடப்படுகிறது. யாரோ ஒருவர் இப்படி தினமும் வாசிக்கின்றார் என்பதை என்னுடைய அனுமானத்தில் அறிய முடிகிறது. நீங்கள் தொடர்ந்து இந்த வலைப்பதிவின் ஓரத்தில் உள்ள 'Live Traffic Feed'பெட்டியை கவனித்தால் புரியும். ஆனால் அவர் ஏன் அப்படி தொடர்ந்து பார்க்கின்றார் அல்லது வாசிக்கின்றார், யார் அவர் என்று எனக்குத் தெரியவில்லை. அவருக்கு என்ன தெரிய வேண்டும் என்பதும் புரியாத மர்மமாக உள்ளது. அல்லது 'அந்தக் கட்டுரையை அவர் தொடர்ந்து பார்க்கிறார் என்பதை நான் அறிந்து கொள்ள வேண்டும் என்று அவர் நினைக்கிறாரா ?" - அதுவும் புரியவில்லை.

அந்த டிஸ்க் பல்ஜ் வலி எனது நண்பருக்கு ஏற்பட்டது, என்று நான் கட்டுரையை தொடங்கி இருந்தாலும், உள்ளபடி அந்த வலி எனக்குதான் ஏற்பட்டது. அக்கட்டுரையின் முடிவில் 'வலி வந்தது எனக்குத்தான்' என்பதை புரிய வைத்திருப்பேன். சிறிய எழுத்துகளில் இருக்கும் அதையும் படித்து என் மீது அன்பு கொண்டவர்கள், 'உங்களுக்கு ஏதோ வலியாமே..? இப்போ எப்படி இருக்கு..?" என்று கேட்கத் தொடங்கி, அதற்கு நான் பதில் அளித்து கொஞ்ச காலம் இப்படியே சென்றது. சிறிய எழுத்துக்கே இப்படி என்றால், 'எனக்குத்தான் வலி' என்று பெரிய எழுத்துகளில் எழுதி இருந்தால்...? சில சமயங்களில் சில சங்கடங்களை தவிர்க்க வேண்டி உள்ளது. எனினும் அப்படி என் மீது அன்பு கொண்டு விசாரித்தவர்களுக்கும் நன்றி.

இன்னும் சிலர் திடீரென ஒரு தொடர்பில்லாத கேள்வியை கேட்டு வலைப்பதிவிற்கு பின்னூட்டமாக அனுப்புவர். ஏதோ என்னிடம் கேட்க வேண்டும் என்ற நோக்கில் அது இருக்கும். அவர்களின் விவரங்கள் பார்த்தால் அது அப்போதுதான் உருவாக்கப்பட்டதாக இருக்கும். இப்படியும் சில நேரங்களில் சில மனிதர்கள்.

வலைப்பதிவில் எழுதுவதால் ஒரு வலைப்பதிவாளருக்கு என்ன பயன்?

இது ஒரு முக்கிய கேள்வி என்கிறீர்களா? இந்தக் கேள்விக்கு என்ன பதில் சொல்வது?

நீங்கள் எழுதுவதற்கு யாராவது பணம் கொட்டித் தருகிறார்களா? 'ஒரு பைசா வருமானமும் கிடையாது' என்று உங்கள் மனது உடனே பதில் சொல்லியிருக்குமே ?

சரி போகட்டும்.. வேறு ஏதேனும் வருமானம் உண்டா, என்ற ஒரு கேள்வியை எழுப்பினால், கூகுள் 'ஆட்சென்ஸ்' என்று ஒரு நிறுவனம் அல்லது அமைப்பு அல்லது ஏதோ ஒன்று (!) நமது வலைப்பதிவில் விளம்பரங்களை வைக்குமாம். அதுவும் வலைப்பதிவு மிகவும் பிரபலமான, பலர் வாசிக்கக் கூடிய ஒன்றாக இருக்க வேண்டும். அவ்வாறு அப்போதைக்கப்போது வைக்கும் விளம்பரங்களின் மீது யாரவது சொடுக்கி, அது சம்பந்தப்பட்ட வலைதளத்திற்கு சென்றால், ஒரு சொடக்குக்கு ஏதோ 'ஒரு காசு.. ரெண்டு காசு' என்ற சொற்ப வீதத்தில், காசு தருவார்களாம். இந்தச் சங்கதி எல்லா வலைப்பதிவர்களுக்கும் தெரியும். ஆனால் இந்த 'ஆட்சென்ஸ்'-இல் நீங்கள் பதிவு செய்து கொள்ள விரும்பி, அது கேட்கும் தகவல்களை பூர்த்தி செய்து மின்னஞ்சல் வாயிலாக விண்ணப்பம் செய்தால், நமக்கு இரண்டு நாட்கள் கழித்து ஒரு பதில் வரும். அதில் 'உங்கள் வலைப்பதிவின் மொழி ஆட்சென்ஸ் அங்கீகரிக்காத மொழியாக (அதாவது நமது செம்மொழி தமிழ்) இருப்பதால், உங்கள் வலைப்பதிவை ஏற்க முடியாது. எனவே நிராகரிக்கின்றோம்' என்று நமது விண்ணப்பத்தை தள்ளுபடி செய்து விடுவார்கள். தமிழ் மொழியில் வெளியாகும் பதிவுகளை 'ஆட்சென்ஸ்' அங்கீகரிக்க வேண்டும்.

இப்படி பணரீதியாக பெரிய பயன் ஒன்றும் இல்லை. இதை சக பதிவர்கள் பெரும்பாலும் ஆமோதிப்பார்கள் என்று நினைக்கின்றேன். 'ஆனால் மனரீதியாக ஏதோ ஒரு மகிழ்ச்சி கிடைக்கிறது' என்று சொல்வது எனக்கு புரிகிறது. ஆம், வலைப்பதிவர்களுக்கு கிடைப்பது அந்த மகிழ்ச்சி ஒன்றுதான்.

நாம் வாசித்து புரிந்து கொண்டதை, நமக்கு தெரிந்ததை, நமது சிந்தனைகளை, நாம் கேட்டதை, பார்த்ததை, உணர முடிந்ததை, நமது அனுபவத்தை, கண்டு பிடித்ததை இந்த வலைப்பதிவின் மூலம் வெளி உலகிற்கு எடுத்து சொல்கிறோம். ஒன்றிரண்டு பக்க அளவில்.

சாமானிய மக்கள் இவற்றை அச்சில் சொந்தமாக கொண்டு வந்து, உலகம் முழுக்க விநியோகம் செய்ய முடியுமா? நிச்சயம் முடியாது. அல்லது வேறு யாரும் பிரசுரம் செய்ய முன் வருவார்களா? வேண்டுமானால் ஒரு முழுப் புததகமாக எழுதி, அது சம காலத்திற்கு பயன் அல்லது மகிழ்ச்சி தருவதாக இருந்தால், பதிப்பாளர்கள் முன் வரலாம். அதற்கும் ஆரம்பத்தில் பணம் தரமாட்டார்கள். பதிப்பாகி வெளி வந்த புத்தகத்தில் 50 அல்லது 100௦௦ புத்தகத்தை ௦௦ தருவார்கள்.

அந்த வகையில் இந்த வலைப்பதிவு பன்மடங்கு சிறந்தது என்றே கூற வேண்டும். நமது நேரம் ஒன்று மட்டும் செலவாகிறது. கருத்துகள் வெளியே உடனுக்குடன் பறக்கிறது, அதுவும் அகிலம் முழுக்க. ஆனால் மனமகிழ்ச்சி ஒன்றை தவிர வேறு பிரதிபலன் ஏதும் இல்லாமல். இதுவும் ஒரு சேவை, அதுவும் இலவசமாக !

மற்றொரு சங்கதியும் இங்கு கவனிக்கத் தக்கது. அதாவது நாம் இணையதளம் வாயிலாக எழுதும் அல்லது பதிக்கும் எல்லாம், அறிவியல் உள்ளவரை இருக்கும். ஒரு கணினி இருந்தால் எங்கும், எப்போது வேண்டுமானாலும் பார்க்கலாம், வாசிக்கலாம், அச்செடுத்துக் கொள்ளலாம். நமது சிந்தனைகளின் பெட்டகம், இந்த வலைப்பதிவு கருத்துரு.

ஏடு கூட கிழிந்து விடலாம். ஆனால் ஒரு பதிவை அப்பதிவர் நீக்கினால் தவிர மற்றவர் நீக்க முடியாது; அழிக்க முடியாது.

இன்று சிறப்பான, பயன் தரக்கூடிய வலைப்பதிவுகள் பல உள்ளன. அவை அடிக்கடி உலகம் முழுக்க உலவப்படுகின்றன. அவற்றை பெரிய வணிக நிறுவனங்கள் இனம் கண்டு, அவற்றில் தங்கள் விளம்பரங்களை பதிக்க முன் வர வேண்டும். சில வலைப்பதிவுகளில் இவ்வாறு காண முடிகிறது. ஆனால் இது பரவலாக்கப்பட வேண்டும். இதற்கு வலைப்பதிவாளர்களுக்கு கணிசமாக ஒரு தொகை தரமுடியாது போனாலும், மாதாமாதம் ஒரு சிறு தொகையை ஊக்கத் தொகையாக வழங்க அந்நிறுவனங்கள் முன் வர வேண்டும்.

இப்பதிவுலகம் நாளாவட்டத்தில் மிகப் பிரதானமான ஊடகக் களமாக உருவெடுக்கும் வாய்ப்பு உள்ளது. இந்த நேரத்தில் பதிவர்களுக்கு ஒரு சங்கம் அமைக்கப் பெற்றால் இன்னும் சிறப்பாக இருக்கும். பதிவர்கள் சந்திக்கலாம், அவர்களுக்கு நன்மையும், பலனும் தரும் சங்கதிகளை கூடி விவாதிக்கலாம்.

முடிவில், வலைப்பதிவில் நாம் எழுதும் விடயங்கள் யாரோ ஒருவருக்கு மகிழ்ச்சியை தருகிறது, யாரோ ஒருவர் பயன் பெறுகிறார், யாரோ ஒருவரின் சிந்தனைக்கு விருந்தாகிறது என்ற அளவில் வலைப்பதிவர்கள் அனைவரும் மன மகிழ்ச்சி (ஆத்ம திருப்தி) கொள்கின்றனர். இதுதான் நேரத்தை ஒதுக்கி எழுதும் பதிவர்களுக்கு கிடைக்கும் மறுபயன். எழுதியதற்கு மறுமொழியும், அதிக ஓட்டும் கிடைத்தால், இந்த மகிழ்ச்சி இரட்டிப்பு ஆகிறது.

அவ்வாறே நானும் மன மகிழ்ச்சி அடைகின்றேன். நான் சிறிது காலம் சில பின்னடைவு காரணமாக மிக மன வருத்தத்தில் இருந்தேன். அந்த நேரத்தில் இந்த வலைப்பதிவில் அவ்வப்போது எழுதி வந்ததின் வாயிலாக, அந்த வருத்தத்தை திசை திருப்பிக் கொள்ள வழி கிடைத்தது. பதிவர்களுக்கு இப்படியும் ஒரு ஆறுதலை தருகிறது இந்தப் பதிவுலகம்.

திரட்டிகளுக்கு நன்றி !!

எனது பதிவு உள்ளிட்ட மற்ற எல்லா பதிவர்களின் பதிவுகளையும் திரட்டி அளித்து வரும் தமிழ்மணம், tamil10, indli, Thiratti, valaiyugam, thamilbest, valaipookal, ulavu, தமிழ்வெளி, Udanz, yellameytamil ஆகிய வலைதளங்களுக்கு நன்றி தெரிவிக்காது போனால் இக்கட்டுரை முழுமை பெறாது. அந்த வகையில் அவர்களுக்கும் மனமார்ந்த நன்றிகளை தெரிவித்துக் கொள்கின்றேன்.

நன்றி..

வணக்கம்.

"ஊரு ரெண்டுபட்டால் கூத்தாடிக்கு கொண்டாட்டம்"

2011-11-20T15:35:00.005+05:30

"ஊரு ரெண்டுபட்டால் கூத்தாடிக்கு கொண்டாட்டம்"

ஏன் இந்த பேச்சு வழக்கு வந்தது?

கூத்தாடி என்பவர், கூத்தாடி மக்களை மகிழ்வித்து பணம் சம்பாதிப்பவர். ஊர்ஊராக சென்று தனது கூத்தாட்டத்தை காண்பித்து அந்த ஊர் மக்களை மகிழ்வித்து பணம் ஈட்டுபவர். ஒரே ஊரில் நீண்ட நாள் தனது வித்தையை காட்ட முடியாது. மக்களுக்கு அலுப்பு தட்டி விடும். பணமும் வராது; பயனும் இராது. அவனது வித்தையை தெரிந்த மக்களுக்கு சலிப்பாகி விடும்.

ஆனால் ஒரே ஊர் ஏதோ பிரச்சனை காரணமாக ரெண்டுபட்டால் கூத்தாடிக்கு மிகவும் வசதியாகி விடும். ரெண்டுபட்ட மக்களிடையே மாற்றிமாற்றி தனது வித்தையை காட்டி பிழைக்கலாம். அந்த நேரத்திற்கு அவர்களுக்கு உள்ள பிரச்சனை அடிப்படையில் தனது கூத்தாட்டத்தை வடிவமைத்துக் கொள்ளலாம். இரண்டு தரப்பினரில் எந்த தரப்பு மக்களுக்கு தனது கூத்தாட்டத்தை அவர் காண்பிக்கின்றரோ அந்த தரப்பு மக்களை உயர்த்தியும், அவர்களது செயல்களை நியாயப்படுத்தியும், மற்றொரு தரப்பு மக்களின் செயலை மட்டம் தட்டியும் வசனம் பேசி, நடித்து, பாட்டு பாடி கவரலாம். மாற்றிமாற்றி 'சீன்' போடலாம்.

இப்படி ரெண்டு பக்கமும் கூத்தாட கூத்தாட அவனுக்கு வருமானமும் கூடிக் கொண்டே போகும். மக்களும், "என்னமா அவுகளைப் பத்தி நக்கல் பண்ணி பாட்டு பாடுறான் பாரு" என்று ஆமோதித்து, வரவேற்றுக் கொண்டிருப்பார்கள், விவரம் தெரியாமல்.

சில சமயம் மற்றொரு தரப்பினர் 'இதை செய்வார்கள்.. அதை செய்வார்கள்' என்று பயமுறுத்தியும் பாடுவான். ஆனால் அவர்களால் ஒன்றும் செய்ய முடியாது என்று சவாலும் விடுவான். கூத்தாடியை சட்டென புரிந்து கொள்ள முடியாது. அவன் நேரத்துக்கு தக்க வேஷம் கட்டி, வசனம் பேசுபவன். ரெண்டுபட்ட ஊரை ரெண்டாகவே வைத்து, அவன் தனது பிழைப்புக்கு வழி செய்து கொண்டிருக்கிறான் என்பதுதான் நிதர்சனம். அந்த மக்கள் சமாதானம் ஆனாலும், அதற்கும் விடமாட்டன். சண்டையிட்டுக் கொண்டே இருக்கும்படி தூண்டுவான். இதனால் இரு தரப்பினருக்கும் நிறைய இழப்பு ஏற்படும். காலம் முழுக்க நீங்கா மனவருத்தம் ஏற்படும். 'நாம் ஏன் சண்டையிட்டுக் கொள்ள வேண்டும் என்றோ.. இவனால்தான் தாங்கள் இந்த நிலையில் இருக்கின்றோம் என்றோ.. ரெண்டுபட்ட மக்கள் ஒருக்கணம் ஒற்றுமையாக சிந்திக்க ஆரம்பித்து விட்டாலே போதும், கூத்தாடியின் வேஷம் களைந்து விடும். அவனது ஆட்டம் முடிவடைந்து விடும். இங்கே இவ்வளவுதான் தனது பப்பு வேகும் என்று எண்ணி உடனே தனது படுதாவை தூக்கி கொண்டு வேறு ஊருக்கு ஓடி விடுவான். இதனால்தான் 'ஊரு ரெண்டுபட்டால் கூத்தாடிக்கு கொண்டாட்டம்' என்று பேச்சு வழக்கு தோன்றியது என்று சொல்லலாம்.

இது ஒரு பொதுவான நிலைப்பாடு. விதிவிலக்குகளைப் பற்றி பேசவில்லை.

நாம் மேலே கண்ட அத்தகு கூத்தாடியை அதே பெயர் கொண்டு அழைப்பதை விட இன்னொரு பெயராலும் அழைக்கலாம். அது 'அனுகூல சத்துரு' எனப்படும். நல்லது செய்வதாகக் கூறி ஒட்டிக் கொண்டு, அவனது பிழைப்பை ஓட்டிக் கொள்வான். நட்பாக பழகி தனது இடத்தை இரண்டு பக்கமும் நிலையாக தக்க வைத்துக் கொள்வான். இரு தரப்பு பிரச்சனைகளில் உண்மையான எதிரியே இப்படிப்பட்ட அனுகூல சத்துருக்கள்தாம். அவன் யாருக்கும் அனுகூலம் செய்வதில்லை. அனுகூலம் செய்வதாக சொல்லி அவன் தனக்கு அனுகூலம் தேடிக் கொள்வான். அவன் செய்வது அனுகூலம் என்று நம்பினால் இறுதியில் ஏமாற்றமே மிஞ்சும். பிரச்சனைக்குரிய இரு தரப்பினரில் யாராவது விட்டுக் கொடுத்தலொழிய பிரச்சனை முடியாது. யாரும் விட்டுக் கொடுப்பதில்லை என்றால் பிரச்சனை பெரிதாகும். அப்படி பெரிதானால் இந்த அனுகூல சத்துருக்கு இன்னும் கொண்டாட்டம். பிரச்சனை வேறு வகையில் மேலும் பெரிதானால் 'நமக்கெதுக்கு ரிஸ்க்' என்று அப்படியே போட்டது போட்டபடியும் ஓடி விடுவான்.

இந்த அனுகூல சத்துருக்கள் பிரச்னை தோன்றக் கூடிய இடங்களில் எல்லாம் இருப்பார்கள். அல்லது சும்மா இருந்தாலும் கோள்மூட்டி பிரச்சனைகளை தோற்றுவிப்பார்கள். அதற்கு இரு தரப்பிலும் ஆரம்பத்திலிருந்தே மிக நம்பிக்கைக்கு உரிய நபராக பழகுவார்கள். பின் ஒருவரை மற்றொருவருக்கு எதிராக குழி தோண்ட வைப்பான். உண்மையில் அந்த இரு தரப்பினரும் தங்களுக்காக குழி தோண்ட வைக்கின்றான் இவன்.

இரு தரப்பினருக்கும் விவரம் தெரியும் போது இந்த 'அனுகூல சத்துரு' ஒரு மிகப் பெரிய 'நம்பிக்கை துரோகி', 'கூட இருந்து குழி பறிப்பவன்' என்பது புலனாகும்.

இப்படிப்பட்ட கூத்தாடிகள், அனுகூல சத்துருக்கள், நம்பிக்கை துரோகிகள் புதிதாக எங்கிருந்தும் முளைப்பதில்லை. இவர்கள் நமக்கு மிக அருகிலேயே இருந்து கொண்டு நமது செயல்களை கவனித்துக் கொண்டிருப்பார்கள். எப்போது ஏமாறுவார்கள், எப்போது சண்டை மூட்டி விடலாம் என்று காத்திருப்பார்கள். ஒரு குடும்பத்தில், நட்பு வட்டத்தில், தொழிலில் இப்படிப்பட்டவர்களை சாதாரணமாக காணலாம். இதில் மிகவும் சிரமமானது இவர்களை அடையாளம் கண்டு கொள்வது. அவ்வளவு அருமையாக நடிப்பார்கள், முதலைக் கண்ணீர் கூட வடிப்பார்கள். கண்டறிவது கடினம். ஆனால் அப்படியும் கண்டு கொள்ள வேண்டும் என்றால் அதற்கு ஒரு வழி உள்ளது. இப்படிப்பட்ட துரோகிகள் நமது குடும்ப விவகாரங்களில், பிரச்சனைகளில் திடீரென அளவுக்கு அதிகமான ஆர்வம் காட்டுவார்கள். நமது நம்பிக்கைக்குரிய மற்றவர்களை சந்தேகம் கொள்ள வைப்பார்கள். அதற்கு ஏதோ சம்பவங்களை நினைவு கூர்ந்து பேசுவார்கள். உண்மையில் அவன் எதிர் தரப்பினரின் கையாளாக அப்போது செயல்பட்டுக் கொண்டிருப்பான். நம்மிடமிருந்து விவரங்களை கேட்டறிந்து எதை சொன்னால் பிரச்சனை முடிவுக்கு வருமோ அதைச் சொல்லாமல் இதர விவரங்களை சொல்லி பிரச்னையை மேலும் பெரிதாக்குவன். விவரங்கள் எப்படி தெரிகின்றன என்று கேட்டால் ஏதோ ஞானோதயத்தில் தெரிந்தது போல் பாவனை காட்டி பேசுவான். செய்வதெல்லாம் பித்தலாட்டம், ஆனால் மிகவும் தெரிந்தது போல் கட்டி ஏமாற்றுவான். இப்படி மாற்றி மாற்றி நல்லவனாக நடித்து, பிழைப்பை ஓட்டிக் கொள்வான். எந்தப் பக்கம் ஒட்டினால் நிறைய பலன் கிடைக்கும் என்பதை கணித்து அந்தப் பக்கம் நன்றாக ஒட்டிக் கொள்வான். எதிர் தரப்பினரை மறைமுகமாக மிரட்டவும் செய்வான். அந்த எதிர் தரப்பினர் அவனுக்கு ஆதியில் பல நன்மைகள் செய்திருந்தாலும், அதை முற்றிலும் மறந்து நன்றி கெட்டதனத்தின் மொத்த உருவமாக நிற்பான். இவன் ஒரு தரப்பினருக்கு தந்திரமாக சொல்லிக் கொடுக்கும் திட்டங்கள் யாவும் பெரிதும் 'பேக் பயர்' ஆகிவிடும். 'கெடுவான் கேடு நினைப்பான்' என்பதை இவனை ஆதரவாக சார்ந்து நிற்கும் தரப்பினர் விரைவில் புரிந்து கொண்டால் நிம்மதியும் சாந்தியும் கிட்டும்.

இப்படிப்பட்டவரின் லீலைகளை இன்னும் நிறைய சொல்லலாம்.

எனவே பிரச்சனைகளின் போது 'சம்மன்' இல்லாமல் வாஞ்சையாக 'ஆஜராகும்' இப்படிப்பட்ட பேர்வழிகளிடம் இருந்து கொஞ்சம் (கொஞ்சம் என்ன நிறையவே) எட்டி இருங்கள். இல்லாவிட்டால் தங்கள் சுயநலத்திற்காக மொத்த வாழ்வையே கெடுத்து விடுவார்கள் ! அடையாளம் கண்டு கொண்டால் அவனை ஒரு அற்பபதராக, ஒரு புழுவாக கருதி, 'சீ... நீ இவ்வளவுதானா?...' என்று அவனை மன்னித்து விடுங்கள். அவன் வேறு இடம் போய் விடுவான்.

சில தினங்களுக்கு முன் ஒரு பதிவர் 'துரோகம்' பற்றி மிகச் சிறப்பாக எழுதி இருந்ததை வாசித்தேன். அதை அவரது அனுமதியுடன் இங்கு மேற்கோளாக சுட்டிக் காட்டினால் மிகப் பொருத்தமாக இருக்கும்.

தலைப்பு : ஒரு துரோகத்தின் முன்னால்

ஒரு துரோகத்தின் முன்னால்
எப்படி நடந்துகொள்ள வேண்டும்
என்பதைப் பற்றிச் சில குறிப்புகள்...

சற்றும் எதிர்பாராத நேரத்தில்
வந்து நிற்கும்
அழையா விருந்தாளிபோல
துரோகம் ஒன்று
முன்னே வந்து நிற்கலாம்

ஒருவேளை
வெகு அருகிலேயே
ஒரு திருடனைப் போல
ஓடி ஒளிந்துகொண்டிருக்கலாம்

அதன் முன்பு
கண்ணீர்விட்டோ
அழுது புலம்பியோ
ஒரு துளி இரக்கத்தைப்
பெற்றுவிடலாமென்று
நினைத்துவிடாதீர்கள்

அது
அன்பை... காத்திருப்பை
தியாகத்தை... துயரத்தை
ஒருபோதும்
ஏறிட்டுப் பார்க்காது

மூக்கு நுனியில்
நாற்காலியிட்டு அமர்ந்திருக்கும்
உங்களின் பெருங்கோபம்
நியாயமானதென்றாலும்
மற்றவர் முன்னிலையில் அதனை
அடையாளம் காட்டியோ
சத்தம் போட்டோ
பேசிட வேண்டாம்

உங்களைக் குற்றவாளியாக்கிப் பார்த்திட
ஓராயிரம் பொய்களைப்
புனைந்து வந்திருக்கும் அது

சற்றும் பொருட்படுத்தாது
விட்டுவிடுங்கள் அல்லது
புன்னகை ஒன்றை ஏற்றி
வாசல் வரை சென்று
வழியனுப்பிப் பாருங்கள்

தலைகுனிந்தவாறு
விடைபெறாமலேயே
சென்றுவிடக்கூடும்

அதிகம் கடினம் என்றாலும்
பெருங்கருணைகொண்டு
மன்னித்துவிடுங்கள்.

அடுத்த நிமிடமே
அது இறந்துவிடும்!

நன்றி : http://thedipaar.com/news/news.php?id=36217#

'கணவன் - மனைவி' தத்துவங்கள் !

2011-11-18T10:09:00.000+05:30

பயம் ஒரு மாயை !

2011-11-13T01:51:00.002+05:30

நீங்கள் இருட்டைக் கண்டு பயப்படுகிறவர் இல்லை !

அந்த இருட்டில் என்ன இருக்குமோ என்று பயப்படுகிறீர்கள்.

நீங்கள் உயரத்தைக் கண்டு பயப்படுகிறவர் இல்லை !

உயரத்தில் இருந்து கீழே விழுந்து விட்டால் என்னாகும் என்று பயப்படுகிறீர்கள்.

நீங்கள் நம்பிக்கை வைக்க பயப்படுகிறவர் இல்லை !

நினைத்தபடி நடக்குமா என்று பயப்படுகிறீர்கள்.

நீங்கள் உங்களை சுற்றி இருப்பவர்களைக் கண்டு பயப்படுகிறவர் இல்லை !

அவர்கள் உங்களை வெறுத்து விடுவார்களோ என்று பயப்படுகிறீர்கள்.

நீங்கள் காதலிக்க பயப்படுகிறவர் இல்லை !

உங்களை காதலிக்காமல் போனால் என்ன செய்வது என்று பயப்படுகிறீர்கள்.

நீங்கள் மீண்டும் முயற்சி செய்ய பயப்படுகிறவர் இல்லை !

அதுவும் தோல்வியில் முடிந்து விட்டால் என்ன செய்வது என்று பயப்படுகிறீர்கள்.

நீங்கள் மகிழ்ச்சியாக வாழ பயப்படுகிறவர் இல்லை!

அது மற்றவர்களின் பார்வைக்கு ஆளாகுமே என்று பயப்படுகிறீர்கள்.

நீங்கள் தொழில் செய்ய பயப்படுகிறவர் இல்லை !

அது இழப்பு ஏதும் ஏற்படுத்திவிடுமா என்று பயப்படுகிறீர்கள்.

நீங்கள் பணம் சேர்க்க பயப்படுகிறவர் இல்லை !

சேர்த்த பணம் நிற்குமா என்று பயப்படுகிறீர்கள்.

நீங்கள் வயிறு புடைக்க சாப்பிட பயப்படுகிறவர் இல்லை !

சாப்பிடுவது சேராமல் போய் விடுமா என்று பயப்படுகிறீர்கள்.

நீங்கள் செலவு செய்ய பயப்படுகிறவர் இல்லை !

மீண்டும் செலவு செய்ய பணம் வருமா என்று பயப்படுகிறீர்கள்.

நீங்கள் பிரயாணம் செய்ய பயப்படுகிறவர் இல்லை !

ஏதேனும் விபத்து நடந்தால் என்னவாகும் என்று பயப்படுகிறீர்கள்.

அடேங்கப்பா எவ்வளவு பெரிய்ய 1 GB ?

2011-11-12T01:29:00.003+05:30

ஒரு கணினியில் விவரங்களை சேகரித்திட வன்வட்டு (Hard Disk) வேண்டும். அதில் எந்த அளவு சேகரிக்க முடியும் என்பதை பொறுத்து அந்த கணினியின் விலை மதிப்பு மாறும்; அதிகரிக்கும்.

கணினி பரவலாக பயன்பாட்டிற்கு வர ஆரம்பித்த காலத்தில் இந்த இட அளவை MB (Megabyte) என்றார்கள். அதே நேரத்தில் கூடவே மெல்லமெல்ல ஜிகா பைட்ஸ் (ஜிபி) (GB) அறிமுகம் ஆகிக் கொண்டிருந்தது. 1 GB இட அளவு மெல்ல 4 GB ஆனது. பின் 10 GB ஆனது. பிறகு 160 GB ஆனது. இப்படியே கூடி தற்போது TB (Terabyte) ஆகி விட்டது.

அப்போது பெரிதாக இருந்த கணினியின் அளவு, வடிவமைப்பு நாளாவட்டத்தில் சிறிதாக சுருங்கி விட்டது. அந்த வகையில் இன்றைக்கு இருபது ஆண்டுகளுக்கு முன் இருந்த 1 GB மிகப் பெரியது. ஆனால் அது இன்றைக்கு எந்த அளவு உள்ளது ?

மிகமிகச் சிறியது என்பதை நாம் அனைவரும் அறிவோம்.

பின்வரும் படத்தைப் பாருங்களேன்.. இந்த சங்கதி விளங்கும்..

உலகம் எவ்வளவு சுருங்கி விட்டது..?

11-11-11 - இந்தத் தேதி பெரும் வளர்ச்சியை குறிக்கிறது

2011-11-11T15:15:00.002+05:30

இன்று 11-11-11.

கடந்து போன ஆண்டுகளை நினைத்துப் பார்க்கின்றேன்.

எனக்கு முதலில் பரிச்சயம் ஆனது 7-7-77. இதுதான் நான் எனது வாழ்வில் முதலில் சந்தித்த இப்படிப்பட்ட தேதி.

6-6-66 தேதியின் போது நான் பிறந்திருக்கவில்லை. 7-7-77 தேதியின் போது பத்தாண்டுகளுக்கு ஒரு முறை வரும் அப்படிப்பட்ட தேதியின் சிறப்பு பற்றி ஏதும் எனக்கு தெரியாது. அது குறித்து அப்போது யாரும் சிறப்பாகவும் பேசிக் கொள்ளவில்லை. 7-7-77 தேதியின் போது நான் 4-ஆம் வகுப்பு படித்துக் கொண்டிருந்தேன் என்று நினைக்கின்றேன். அப்போது எனது தந்தை இருந்தார்.

இதை அடுத்து 8-8-88. இந்த தேதியின் சிறப்பு பற்றி அப்போது எங்கள் ஊருக்கு வந்திருந்த எனது சின்னம்மாவின் கணவர் சொன்னார். அவர் இப்படிப்பட்ட தேதிகளில் ஏதாவது ஒரு புதிய பணியை தொடங்குவாராம். அந்த சமயத்தில் எனது தந்தை இல்லை. இறைவனடி சேர்ந்துவிட்டார். நான் கல்லூரி படிப்பு படித்துக் கொண்டிருந்தேன்.

இதற்கு பிறகு 9-9-99. நான் படிப்பை முடித்து சட்டத் தொழிலுக்கு வந்து விட்டேன். மேலும் அந்த காலகட்டத்தில் எனக்கு திருமணமாகி இரண்டு குழந்தைகள்.

எனது தந்தையார் மறைந்த நாள் 10-10௦-85. எனவே 10-10௦-10 அன்று ௦கோவிலுக்கு சென்று வந்தேன்.

இப்போது 11-11-11 வந்துள்ளது. இது பத்தாண்டுகளுக்கு ஒரு முறை என்றில்லாமல் அடுத்த ஆண்டே வந்துள்ளது. இன்று காலை ஒரு நண்பருக்கு பிறந்த நாள் வாழ்த்து சொன்னேன். அவர் 11-11- அன்று பிறந்தவர். காலை நேர பணிகளுக்குப் பிறகு இந்த நிமிடம் இந்தப் பதிவை பதிந்து கொண்டிருக்கிறேன்.

புதுக் கணக்கின் போது பேரேட்டில் ரூ.11/- என்று வரவு வைக்கின்றோம். தட்டில் காணிக்கை போடும் போது ரூ.11/- போடுகிறோம். மொய் வைக்க ரூ.101, 501, 1001 என்று கொடுக்கிறோம். ஏன் இவ்வாறு செய்கிறோம்? எழுதும் தொகை அல்லது கொடுக்கும் தொகை சுழியத்தில் முடியாமல் தொடர்ந்து கணக்கு வளரட்டும். அதாவது பெறுவதும் வளரட்டும்! அதுபோல் கொடுக்கவும் நம் கையில் தொகை வளரட்டும்!! அருளும் உறவும் வளரட்டும் !!! ஒன்னும் ஒன்னும் ரெண்டுதானே? எனவே இந்தப் பதினொன்று என்ற எண் வளர்ச்சியை குறிக்கிறது.

எனவே இந்தப் 11-11-11 என்ற தேதியிலிருந்து இந்தப் பதிவை எழுதிய நானும், அதே நேரத்தில் வாசித்துக் கொண்டிருக்கும் நீங்களும், ஏன் எல்லோரும் வளர்வோம் ! அடுத்த ஆண்டு 12-12-12 வருகிறது. இதுவும் வளர்ச்சி. ஒன்றுக்கு அடுத்து வருவது ரெண்டுதானே?

ஆனால் அதற்கு பிறகு 13-13-13 என்பது சாத்தியமில்லை. பிறகு 01-01-3001-இல்தான். இருக்கும் காலத்தில் சிறப்பாக வாழ்வோம் !

இப்படிப்பட்ட தேதிகளில் ஏதேனும் ஒன்றில் நீங்கள் என்ன செய்தீர்கள் என்பதை ஒரு பின்னூட்டமாக பதிவு செய்யுங்களேன் !

எப்படி இருந்தாலும்.......

2011-11-05T11:30:00.001+05:30

மக்கள் பலசமயங்களில் நியாயமில்லதவர்களாக,
தவறானவர்களாக, சுயநலம் கொண்டவர்களாக உள்ளனர்.

எப்படி இருந்தாலும், அவர்களை மன்னித்து விடு.

நீங்கள் இரக்க குணம் படைத்தவராக இருப்பின்,
மக்கள் உங்களை தன்னலம் கொண்டவர் என்றும்,
உள்நோக்கம் கொண்டவர் என்றும் குறை கூறுவார்;

எப்படி இருந்தாலும், இரக்கத்துடனே இரு.

நீங்கள் வெற்றிகரமானவராக இருப்பின்,
நீங்கள் சில தவறான நண்பர்களையும்,
சில சரியான நண்பர்களையும் வெற்றி காண்பீர்கள்;

எப்படி இருந்தாலும், வெற்றி பெறு.

நீங்கள் நேர்மையானவராக,
வெளிப்படையானவராக இருப்பின்,

மக்கள் உங்களை ஏமாற்றக் கூடும்;

எப்படி இருந்தாலும், நேர்மையானவராக,
வெளிப்படையானவராக இரு.

நீங்கள் பல ஆண்டுகளாக உருவாக்கியதை,

ஒருவன் ஒரே இரவில் அழித்து விடலாம்;

எப்படி இருந்தாலும், உருவாக்கிக் கொண்டிரு.

நீங்கள் பிரச்சனையற்றவராக,
மகிழ்ச்சியானவராக இருப்பதாக தெரிந்தால்,
அது மற்றவர்களை பொறாமைப்பட வைக்கும்;

எப்படி இருந்தாலும், மகிழ்ச்சியாக இரு.

இன்று நீங்கள் செய்யும் நல்லதை,
மக்கள் நாளை மறந்து விடுவர்;

எப்படி இருந்தாலும், நல்லது செய்.

எப்படி இருந்தாலும், உன்னால் முடிந்த சிறந்தது
எதுவோ அதை உலகிற்கு கொடு.

இறுதி பகுப்பாய்வு முடிவு என்பது
உங்களுக்கும் கடவுளுக்கும் இடையேதான் உள்ளது;
அது எப்படி இருந்தாலும் உங்களுக்கும்
அந்த மற்றவர்களுக்கும் இடையே இல்லை
என்பதை அறியுங்கள்.

- அன்னை தெரசா.

பாட்டில் மாறிப்போச்சு; பொண்ணுக்கு புண்ணாச்சு.

2011-11-05T00:30:00.001+05:30

மேற்கு வங்கத்தில் உள்ளது முர்ஷிடபாத் மாவட்டம். இங்குள்ள லால்பாக் எனும் ஊரில் அரசு உட்கோட்ட மருத்துவமனை உள்ளது. இதில் சிக்ஹா பீவி எனும் பெண்மணி பிரசவத்திற்காக அக்டோபர் 31-ஆம் தேதி பிரசவ வலியுடன் சேர்க்கப்பட்டார். இரண்டு தினங்களில் அவருக்கு ஒரு ஆண் குழந்தை பிறந்தது. ஆனால் குழந்தை இறந்து பிறந்ததாக மருத்துவமனை நிருவாகம் கூறியது. அதே நேரத்தில் குழந்தை உயிருடன் பிறந்தாக சிக்ஹா பீவியின் உறவினர்கள் கூறினர்.

இதற்கிடையில்தான் அந்த பயங்கரம் நடந்தது. குழந்தை பெற்ற அப்பெண்மணியின் உள்ளுறுப்பை கிருமி நாசினி கரைசல் (டெட்டால், சவாலான் போன்று) கொண்டு கழுவுவதற்கு பதிலாக, அசிட் ஊற்றி கழுவி உள்ளனர், மருத்துவமனை பணியாளர்கள்.

இதனால் அவளது உள்ளுறுப்பு முழுவதும் வெந்து போனது. அத்துடன் வெளிக் காயங்களும் ஏற்பட்டன.

உறவினர்கள் கொதித்துப் போயினர். எனவே இது குறித்து விசாரிக்க உடனடியாக மருத்துவமனை தலைமை மருத்துவ அலுவலர் பிரேந்திரா குமார், மூன்று நபர் அடங்கிய குழு ஒன்றை அமைத்தார். அக்குழு, இந்த சம்பவம் உட்கருத்துடன், வேண்டுமென்றே செய்யப்பட்டதல்ல என்றும், அப்பெண்மணியை கழுவிய பணியாளர்கள் தவறுதலாக அசிட் ஊற்றி கழுவி உள்ளனர் என்றும், கிருமி நாசினியின் நிறமும், ஆசிடின் நிறமும் ஒன்றாக இருந்த காரணத்தால் இந்தக் குழப்பம் ஏற்பட்டது என்றும், இந்த பாட்டில்கள் மாறிவிட்டன என்றும், மருத்துவமனையை பெருக்குபவர்தான் தவறுதலாக அந்த இடத்தில் ஆசிட் பாட்டிலை வைத்திருக்க வேண்டும் என்றும், மேலும் விசாரித்து வருவதாகவும் கூறி உள்ளனர்.

ஆசிட் உடம்பிலே பட்டாலே தாங்காது. உள்ளுறுப்பிலே பட்ட எவ்வளவு வேதனை ?

வெளியில் இணையதளம் பயன்படுத்துவோருக்கு ஒரு எச்சரிக்கை !

2011-11-03T15:00:00.004+05:30

அண்மையில் பேஸ் புக் தளத்தில் ஒரு பகிர்வை வாசித்தேன். அது பயனுள்ளதாகவும், விழிப்புணர்வை ஊட்டுவதாகவும் இருந்த காரணத்தால் இங்கு சுட்டி கட்ட விளைகின்றேன்.
அதாகப்பட்டது, உங்கள் வீட்டில் அல்லது அலுவலத்தில் இணையதள இணைப்பு கொண்ட கணினி இருந்தால் கவலை இல்லை. ஒரு வேளை அவ்வாறு இல்லாமல் அல்லது அவசர நிமித்தம் காரணமாக வெளியில் இருக்கும் இணைதள சேவை வழங்கும் மையத்திற்கு சென்று பக்கங்களை பார்வை இடப் போகிறீர்கள் என்றால் சற்று எச்சரிக்கையாக இருப்பது நல்லது. நீங்கள் பயன்படுத்த உள்ள கணினியின் cpu பின்புறம் கீழ்வரும் படத்தில் உள்ளது போல் ஏதேனும் கருப்பு 'பின்' சொருகப்பட்டுள்ளதா என்பதை கவனிக்கவும்.

இவ்வாறு சொருகப்பட்டிருப்பின் நீங்கள் அந்தக் கணினியின் வாயிலாக இணையதளத்தில் பதிவு செய்யும் கடவுச் சொற்கள், ரகசிய விவரங்கள் ஆகிய அனைத்தும் தானாக அந்தப் பின் பதிவு செய்து கொண்டு விடும். அவற்றை பிறகு எடுத்துப் பார்த்து மோசடி வேலைகளுக்கு பயன்படுத்தபடக் கூடும்.

எனவே எச்சரிக்கை !

கருத்தடை அறுவை செய்த பிறகும் குழந்தை பிறந்தால் மருத்துவர்கள் இழப்பீடு தர வேண்டும் - மதுரை அமர்வாயம் தீர்ப்பு

2011-11-02T13:58:00.002+05:30

"கருத்தடை அறுவைக்கு பின் மீண்டும் குழந்தை பிறந்தால் அது மருத்துவர்களின் மருத்துவ கவனக்குறைவாகும்" என்று மேல்முறையீடு ஒன்றில் சென்னை உயர் நீதிமன்றத்தின் மதுரை அமர்வாயம் தீர்ப்புரைத்துள்ளது.

கருத்தடை அறுவைக்குப் பிறகும் குழந்தை பிறந்தது !

ஒரு பெண்ணுக்கு 'டயுபக்டமி' எனும் கருத்தடை அறுவை செய்த பிறகு இரட்டைக் குழந்தைகள் பிறந்தததற்காக சம்பந்தப்பட்ட மருத்துவர்கள் இழப்பீடு தரவேண்டும் என்று கீழமை நீதிமன்றம் வழங்கிய தீர்ப்பை எதிர்த்து அந்த மருத்துவர்களும் மருத்துவ அதிகாரஅமைப்புகளும் செய்த மேல்முறையீட்டை தள்ளுபடி செய்து ஆணையிடுகையில் மாண்பமை நீதியரசர் எம்.எம்.சுந்தரேஷ் மேற்கண்டவாறு கருத்துரைத்துள்ளார். எனினும் இவ்வழக்கில் கருத்தடை அறுவை செய்யும் நடைமுறை 100 சதம் வெற்றி தருவதில்லை என்று வல்லுனர்கள் கூறியுள்ளனர்.

வழக்கின் சங்கதிகள் :

இவ்வழக்கில் பாதிக்கப்பட்ட பெண்மணியின் பெயர் சரஸ்வதி. இவர் 1985-ஆம் ஆண்டில் ஆர்.முருகன் என்பவரை மணந்து கொண்டார். இவர்களுக்கு ஏற்கனவே இரண்டு குழந்தைகள் பிறந்துள்ளன. இதற்குப் பிறகு இவர் கருத்தடை அறுவை செய்து கொள்வதற்காக கும்பகோணத்தில் உள்ள அரசு மருத்துவமனையில் சேர்ந்தார். அங்கு 1989-ஆம் ஆண்டு ஜனவரி மாதம் 5-ஆம் தேதியில் சரஸ்வதிக்கு கருத்தடை அறுவை செய்யப்பட்டது.

இந்நிலையில் கிட்டத்தட்ட மூன்று ஆண்டுகள் கழித்து, சரஸ்வதி மீண்டும் கர்ப்பம் தரித்துள்ளதாக உணர்ந்தார். அந்த நேரத்தில் கரு நன்கு வளர்ந்து விட்டிருந்த படியால் அதைக் கலைக்க எந்த நடவடிக்கையும் எடுக்க இயலவில்லை. தொடர்ந்து 1992, செப்டெம்பர் 15-ஆம் தேதியில் கும்பகோணத்தில் உள்ள செயின்ட் அன்னீஸ் மருத்துவமனையில் சரஸ்வதிக்கு இரட்டைக் குழந்தைகள் பிறந்தன.

கருத்தடை அறுவை செய்து கொண்ட பிறகும் குழந்தை அதுவும் இரட்டைக் குழந்தைகள் பிறந்தது, தனக்கு அறுவை செய்த மருத்துவர்களின் கவனக்குறைவை காட்டுகின்றது என்றும், எனவே தனக்கு அவர்கள் இழப்பீடாக ரூபாய் 3 இலட்சம் தர ஆணையிட வேண்டும் என்றும் நீதிமன்றத்தில் வழக்கு தொடர்ந்தார். இவரது கணவர் முருகன் ஒரு தினக் கூலி.

கும்பகோணம் முதன்மை சார்பு நீதிமன்றத்தின் தீர்ப்பு :

வழக்கின் சங்கதிகளை சாட்சியங்களுடன் ஆராய்ந்த கும்பகோணம் முதன்மை சார்பு நீதிமன்றம், சரஸ்வதிக்கு இழப்பீடாக ரூபாய் 1,25,000௦௦௦/-மும், அதற்கு வழக்கு தாக்கல் தேதியில் இருந்து தீர்ப்பாணை பிறப்பிக்கப்பட்ட தேதி வரை 12 சதவீத வட்டியும், அதன் பின் தொகை வசூலாகும் வரை 6 சதவீத வட்டியும், செலவுத் தொகையுடன் பிரதிவாதிகள் வழங்க வேண்டும் என்று தீர்ப்புரைத்தது.

மருத்துவர்களின் மேல்முறையீடு தள்ளுபடி :

இந்த தீர்ப்பை எதிர்த்து தஞ்சாவூர் மாவட்ட நீதிபதி நீதிமன்றத்தில் மருத்துவர்கள் மேல்முறையீடு செய்தனர். ஆனால் அது தள்ளுபடி செய்யப்பட்டு, கீழமை நீதிமன்றத்தின் தீர்ப்பு உறுதி செய்யப்பட்டது.

மதுரை அமர்வாயத்தில் மேல்முறையீடு :

கீழமை விசாரணை நீதிமன்றம் வழங்கிய இத்தீர்ப்பை எதிர்த்து தஞ்சாவூர் மாவட்ட ஆட்சியர், அரசு மருத்துவமனை கண்காணிப்பாளர், கும்பகோணம் நலப் பணிகள் இணை இயக்குனர் உள்ளிட்ட மருத்துவ அதிகாரஅமைப்புகள் சென்னை உயர் நீதிமன்றத்தின் மதுரை அமர்வயத்தில் 2006-ஆம் ஆண்டில் தற்போதைய மேல்முறையீட்டை செய்தனர்.

முன்னதாக இவர்கள் தாக்கல் செய்திருந்த எதிர் வழக்குரையில் சரஸ்வதிக்கு குடும்பக் கட்டுப்பாடு அறுவை வெற்றிகரமாக செய்யப்பட்டது என்றும், ஆனால் இந்த அறுவை நடைமுறையில் 2 சதவீதம் தோல்விக்கு வாய்ப்பு உண்டு என்றும், அப்பெண்மணிக்கு கருத்தடை அறுவை செய்யப்பட்டு இரண்டு ஆண்டுகள் கழிந்த பிறகே அவர் மீண்டும் கருவுற்றுள்ளார், இது அந்த அறுவை வெற்றி பெற்றுள்ளதையே காட்டுகிறது என்றும், எனவே அவருக்கு அறுவை செய்த அரசு மருத்துவமனை மருத்துவர்களின் தரப்பில் எந்த கவனக்குறைவும் இல்லை என்றும் வாதுரைத்திருந்தனர்.

http://timesofindia.indiatimes.com/city/chennai/Pregnant-after-tubectomy-HC-orders-relief-to-woman/articleshow/9476114.cms

'ஜுக்' பத்திரிக்கைக்கு நன்றி !

2011-10-26T14:14:00.004+05:30

'ஜுக்' - இது சௌராஷ்டிரா மொழி பேசும் மக்களுக்காக மதுரையில் இருந்து மாதமொரு முறை வெளி வரும் ஓர் செய்தி மற்றும் விளம்பர பத்திரிக்கை.

தினசரி செய்தித் தாள் அளவில் எட்டு பக்கங்களாக வெளிவரும் இப்பத்திரிக்கையின் ஆசிரியர் திரு பி.ஆர்.கணேஷ் .

சௌராஷ்டிரா மொழிக்கு எழுத்து வடிவம் கிடையாது என்று பலரும் நினைகின்றனர். ஆனால் அது தவறு. எழுத்து வடிவம் உண்டு. மதுரையில் பல சௌராஷ்ட்ர வணிகர்கள் தங்கள் வணிக நிறுவனத்தின் பெயர் பலகையை சௌராஷ்டிர மொழியில் வைத்திருப்பதைக் காணலாம்.

அந்த வகையில் ஆசிரியர் திரு. கணேஷ் அவர்கள் சௌராஷ்டிரா மொழியை எழுத்து வடிவில் பிரபலப்படுத்த தனது 'ஜுக்' பத்திரிக்கை வாயிலாக பெரிதும் பாடுபட்டு வருகிறார். இவரது பத்திரிகையில் சௌராஷ்டிரா வணிகர்கள் கொடுக்கும் விளம்பரங்களில் முதலில் சௌராஷ்ட்ர எழுத்துகளில் அவர்களது நிறுவனப் பெயர் அல்லது அவர்களது பெயர் இடம் பெற்றிருக்கும்.

மாதமொரு முறை வெளியாகும் அந்தப் பத்திரிக்கை நமது சட்டப் பார்வை வலைப்பதிவில் வெளியாகும் சில பதிவுகளை தொகுத்து தனது நவம்பர், 11 பதிப்பின் ஒரு பக்கத்தில் வெளியிட்டுள்ளது. அதன் 'பிடிஎப்' வடிவம் கீழே கொடுக்கப்பட்டுள்ளது.

எனது இந்த வலைப்பதிவில் வெளியான பதிவுகளை வெளியிட்டமைக்கு 'ஜுக்' பத்திரிக்கை ஆசிரியர் திரு கணேஷ் அவர்களுக்கும், சம்பந்தப்பட்ட இதரவர்களுக்கும் எனது நெஞ்சு நிறை நன்றிகளை தெரிவித்துக் கொள்கிறேன்.

நன்றி ! நன்றி !! நன்றி !!!

உங்கள் மண வாழ்க்கை உறுதியானதா ? ஒரு சிறு சோதனை !

2011-10-24T00:23:00.001+05:30

பொதுவாக நாம் மோதிரத்தை நமது கையின் நான்காவது விரலில் அதாவது மோதிர விரலில் போட்டுக் கொள்கிறோம். திருமண நிச்சயதார்த்தம் அல்லது திருமணத்தின் போது மணமகளின் மோதிர விரலில்தான் மணமகன் மோதிரம் அணிவிக்கிறார்.

இவ்வாறு குறிப்பாக திருமண சடங்குகளின் போது நான்காவது விரலில் மோதிரம் அணிவிப்பதற்கு பின்னணியில் சுவாரஸ்யமான அதே நேரத்தில் ஏற்றுக் கொள்ளக் கூடிய கதை ஒன்று உண்டு.

இப்போது நமது கை விரல்களை எடுத்துக் கொள்வோம். முதல் விரலான கட்டை விரல் உங்கள் பெற்றோர்களை குறிக்கிறது. இரண்டாம் விரலான ஆட்காட்டி விரல் உங்களுடன் பிறந்த சகோதர, சகோதரிகளை குறிக்கிறது. மூன்றாம் விரலான நடு விரல் உங்களை குறிக்கிறது. நான்காம் விரலான மோதிர விரல் உங்கள் இல்வாழ்க்கை துணையை குறிக்கிறது. ஐந்தாம் விரலான சுண்டு விரல் உங்கள் குழந்தைகளை குறிக்கிறது.

இப்போது உங்கள் இரண்டு கைகளையும் எடுத்து கீழ்வரும் படத்தில் உள்ளவாறு வைத்துக் கொள்ளுங்கள்.

அதாவது ஒரு கையில் உள்ள நடு விரல் தவிர மற்ற எல்லா விரல்களையும் நீட்டி வைத்து அவ்வாறே மற்றொரு கையிலும் செய்து கொண்டு இப்போது இரண்டையும் ஒன்றுடன் ஒன்று ஒட்டி இருக்குமாறு வைத்துக் கொள்ளவும். நடு விரல் நீங்கள் என்பதால் அது இந்த விளையாட்டிற்கு ஒரு ஒப்புக்கு சப்பா. எனவே அந்த விரலை மடக்கி ஒட்டி வைத்துக் கொள்ளவும்.

அடுத்து ஒன்றுடன் ஒன்றாக ஒட்டி இருக்கும் உங்கள் கட்டை விரல்களை மட்டும் மெல்ல விலக்கவும். (கவனிக்க : இவ்வாறு செய்யும் போது ஒட்டி இருக்கும் மற்ற விரல்களை பிரித்து விடக்கூடாது.) அவற்றை உங்களால் விலக்க அதாவது பிரிக்க முடியும். கட்டை விரல் என்பது உங்கள் பெற்றோர்கள். அவர்கள் உங்களுக்கு ஒரு குறிப்பிட்ட காலம் வரைதான் அரவணைப்பாக இருப்பார்கள்.

அடுத்து ஆட்காட்டி விரல்கள் . இவற்றையும் அவ்வாறே விலக்க முடியும். ஏற்கனவே சொன்னவாறு ஆட்காட்டி விரல் என்பது உங்களுடன் பிறந்தவர்கள். இவர்கள் நாளாவட்டத்தில் தங்களுக்கென ஒரு குடும்பம் அமைத்துக் கொண்டு பிரிந்து விடுவார்கள்.

தொடர்ந்து வருவது நடு விரல்கள் . இவற்றை நீங்கள் ஒன்றும் செய்ய வேண்டியதில்லை. ஏனெனில் இவை நீங்கள்.

இதை அடுத்து மோதிர விரல்கள் . இவற்றை பிரிப்பதற்கு முன் இதற்கு பிறகு வரும் சுண்டு விரல்களை பிரிக்க முடிகிறதா என்று பாருங்கள். இதையும் பிரிக்கலாம். அதாவது சுண்டு விரல் என்பது உங்கள் குழந்தைகள். இவர்கள் வளர்ந்து தங்களுக்கென கணவன்/மனைவி என்று அமைத்துக் கொண்டு சென்று விடுவார்கள்.

இப்போது மோதிர விரல்களுக்கு வருவோம். ஒன்றுடன் ஒன்று ஒட்டி இருக்கும் மோதிர விரல்களை பிரிக்க முடியுமா? நிச்சயமாக முடியாது. ஏனெறால் மோதிர விரல்கள் உங்கள் இல்வாழ்க்கை துணைவி/ துணைவரை குறிக்கின்றது.

இல்வாழ்கை பந்தம் பிரிந்து விடக் கூடாது, உறுதியானதாக இருக்க வேண்டும் என்பதற்காகவே திருமணத்தின் போது மோதிர விரலில் மோதிரம் அணிவிக்கப்படுகின்றது ! _____________________________________________________________________

("மோதிரம் போட்டு என்ன பண்றதுங்க? கட்டிக்கிட்டதிலிருந்து தரித்திரம் பிடிச்ச மாதிரி இருக்கு.." என்று சொல்பவர்களுக்கோ, "எப்படி இவரை திட்டம் போட்டு கவுத்து மெய்ன்டனன்ஸ் கேட்கலாம்" என்று கணவன் கூடவே இருந்து குழி பறிக்க நினைப்பவர்களுக்கோ இக்கதை ஒரு விதிவிலக்கு !)

வளர் தொழில் இதழுக்கு நன்றி !

2011-10-13T13:49:00.002+05:30

கட்டுரையை பிரசுரம் செய்தமைக்கு நன்றி

தகவல் அறியும் உரிமை சட்டப்படி கேட்ட தகவல் தரப்படவில்லையானால் நுகர்வோர் குறை தீர் மன்றத்தில் புகார் செய்யலாம் !

தேசிய நுகர்வோர் குறைகள் தீர் ஆணையம்
வழங்கிய அதிரடித் தீர்ப்பு !

இந்தத் தலைப்பில் நான் கடந்த செப்டம்பர் மாதம் 29 -ஆம் தேதியன்று ஒரு கட்டுரையை இந்த வலைப்பதிவில் எழுதியிருந்தேன். தகவல் மற்றும் நுகர்வோர் ஆர்வலர்களுக்கு பயனுள்ள இத்தீர்ப்பை சென்னையிலிருந்து வெளிவரும் பிரபல திங்களிதழ் 'வளர்தொழில்' தனது அக்டோபர் தீபாவளி இதழில் முழுமையாக வெளியிட்டுள்ளது. அதற்கு என் நெஞ்சார்ந்த நன்றிகளை அதன் ஆசிரியர் திரு. க.ஜெயகிருஷ்ணன் அவர்களுக்கும், பதிப்பகத்தினருக்கும் தெரிவித்துக் கொள்கிறேன்.

பல்வேறு புதிய தொழில்களை அறிமுகப்படுத்துவதுடன், அத்தொழில் செய்பவர்களையும் பேட்டி கண்டு, தொழில் தொடங்க முனைபவர்களை வழிகாட்டும் ஒரு நல்லிதழ் "வளர்தொழில்".

நன்றி ! நன்றி !! நன்றி !!!

நுகர்வோருக்கு ஆதரவான முக்கிய தீர்ப்புகள் !

2011-10-11T22:29:00.013+05:30

_________________________________________________________________________

வேலூர் மாவட்டம் - இன்னொரு 'காக்க காக்க'

2011-10-11T03:06:00.005+05:30

ஒரு நேர்மையான ஐ.பி.எஸ். அதிகாரி தனது பணியில் சந்திக்கும் பிரச்சனைகள் - இது திரைக் கதையின் ஒன் லைன்.

ஐ.பி.எஸ். அதிகாரி முத்துக்குமாராக நந்தா வெளுத்து வாங்கி இருக்கிறார். நல்ல நடிப்பு. உடலசைவும் பேசுகிறது.

எம்.சி.ஏ. படிப்பு முடிந்தவுடன், ஐ.பி.எஸ். தேர்வில் நந்தா வெற்றி பெறுகிறார். தில்லி போலீஸ் அகாடெமி-யில் பயிற்சி முடிந்த கையுடன் வேலூர் மாவட்டத்தில் ஏ.எஸ்.பி.-யாக பதவி ஏற்கும் நந்தா, அங்கு கட்ட பஞ்சாயத்து, ரியல் எஸ்டேட், அரசியல் செய்யும் ஒரு பிரமுகரின் சட்ட விரோத நடவடிக்கைகளை தடுக்கிறார். 'உனக்கெதுக்கு இந்த வேலையெல்லாம்' என்று சீனியர் அதிகாரிகள் கண்டிக்கின்றனர். இது நந்தாவிற்கு பிடிக்கவில்லை. "நீங்கள் எப்படி வேண்டுமானாலும் இருக்கலாம், ஆனால் நான் அப்படி இல்லை" என்று சீனியர் அதிகாரியிடம் சூடாகிறார். கதையும் மெல்ல சூடு பிடிக்கிறது.

இதைத் தொடர்ந்து நந்தாவிற்கு அந்த பிரமுகரால் நிறைய அவமானங்கள் ஏற்படுகின்றன. அப்பிரமுகருக்கு எதிராக தகுந்த சாட்சியங்களுடன் ஒரு வழக்கை நீதிமன்றத்தில் நந்தா முன் வைக்கிறார். ஆனால் அத்தனை சாட்சியங்களும் அப்பிரமுகரால் முறியடிக்கப்படுகின்றன. அரசு வழக்கு தோற்று விடுகிறது. ஒரு ஐ.பி.எஸ். அதிகாரியாக இருந்தும் ஒன்றும் செய்ய முடியவில்லையே என்று கடும் மன உளைச்சலுக்கு ஆளாகி தனது ஏ.எஸ்.பி. பதவியை ராஜினாமா செய்ய முடிவெடுத்து அதற்கான கடிதத்தையும் தனது மேலதிகாரியிடம் கொடுக்கிறார், நந்தா.

வீட்டிற்கு திரும்பும் வழியில் அப்பிரமுகர் நந்தாவை கேலி செய்கிறார். ஏற்கனவே கொந்தளிப்பான மன நிலையில் இருந்த நந்தா, அவரை அடித்து புரட்டி எடுத்து விடுகிறார். எல்லா விசைக்கும் எதிர் விசை உள்ளது. அவர், ஆள் வைத்து நந்தாவை அடித்து துவைத்து எடுத்து விடுகிறார். உயிருக்கு ஆபத்தான நிலையில் நந்தா மருத்துவமனையில் படுத்திருக்கும் காட்சியில் இருந்து படம் ஆரம்பிக்கிறது. மேற்சொன்னது எல்லாம் இடைவேளை வரை ஒரு பிளாஷ்பேக்.

தில்லி உயர் அதிகாரிகள் நந்தா தனது பதவியை ராஜினாமா செய்யக் கூடாது, அவர் தொடர்ந்து பணியாற்றி அப்பிரமுகரையும், அவர் சார்ந்த ஆட்களையும் சட்டத்தின் முன் நிறுத்த வேண்டும் என்று வேண்டுகோள் வைக்கின்றனர். இதை ஏற்று நந்தா மீண்டும் அதே வேலூர் மாவட்டத்தில் தனது பணியை தொடர்கிறார். இம்முறை தனக்கென ஒரு டீமை உருவாக்கி அவர்களின் துணையுடன் அப்பிரமுகரை சுற்றி வளைக்கிறார்.

அப்பிரமுகர் மாட்டிக் கொண்டால் அவருக்கு பின்னால் இருக்கும் இன்னொருவரும் மாட்டிக் கொள்வார். அந்த இன்னொருவர் ஒரு அமைச்சர். பிரமுகரை அதாவது அமைச்சரின் கைத்தடியை காப்பாற்ற அமைச்சர் பலவாறு முயற்சி செய்கிறார். ஆனால் பலன் இல்லை. எனவே அமைச்சர் தனது கையாளான பிரமுகரை போட்டுத் தள்ள ஏற்பாடு செய்து அவ்வாறு போட்டும் தள்ளி விடுகிறார். பிறகு அமைச்சர் எப்படி நந்தாவிடம் சட்டப்படி மாட்டிக் கொள்கிறார் என்பது கடைசி 10 நிமிடக் கதை.

கல்பாத்தி அகோரத்தின் தயாரிப்பில் வெளி வந்துள்ள இப்படத்தில் விறுவிறுப்புக்கு கொஞ்சம்கூட பஞ்சமில்லை. காட்சிகள் பரபரப்பாக நகர்கின்றன, மாறுகின்றன. நடிப்பில் போட்டிக் போட்டுக் கொண்டு அனைவரும் நடித்துள்ளனர்.

நந்தாவிற்கு ஜோடியாக பூர்ணா. அவருக்கு பெரிய வேலை ஒன்றும் படத்தில் இல்லை. மனதிலும் பதியவில்லை. சாரி !

நகைச்சுவைக்கு சந்தானம். இன்னும் பல ஆண்டுகள் அவர் திரையில் நிலைத்து நிற்பார். இரசிக்கும்படியான, இயல்பான நடிப்பு. அவருக்கு சிங்கமுத்து அப்பா. ஆனால் இருவரும் அடிக்கும் லூட்டி கொஞ்சம் ஓவர்.

ஆரம்பத்தில் தில்லி, செங்கோட்டை ஆகிய இடங்களில் இருந்து பின் வேலூர், காட்பாடி, சத்துவாச்சாரி, வேலப்பாடி, ஜலகண்டேஸ்வரர் கோவில், சி.எம்.சி. மருத்துவமனை, ஏலகிரி மலை என்று காமிரா சுழல்கிறது. திறமையான படப்பிடிப்பு, ஒளிப்பதிவு. காதை உறுத்தாத பின்னணி இசை.

பாடல்கள் மட்டும் நன்றாக அமைந்து இருந்தால், 'வேலூர் மாவட்டம்' இன்னொரு 'காக்க காக்க'. படம் நன்றாக இருக்கிறது.

காசுக்கு மோசமில்லை ! பார்க்கலாம் !!

பிசியோதெரபி பட்டதாரிகளின் எதிர்காலம் கேள்விக்குறியாகி வருகிறது ! மாநில பிசியோதெரபி கவுன்சில் அமைக்கப்பட வேண்டும் !!

2011-10-10T15:37:00.003+05:30

பக்கவாதம், முகவாதம், தண்டுவடம் போன்ற நரம்பியல் நோய்கள், மூட்டுவலி, கழுத்து வலி, எலும்பு முறிவு, தசைப் பிடிப்பு போன்ற எலும்பியல் நோய்கள் உட்பட பல்வேறு நோய்களுக்கு சிகிச்சை அளிப்பதில் உடலியக்க மருத்துவமுறை (பிசியோதெரபி) முக்கிய பங்கு வகிக்கிறது.

மூட்டு மாற்று அறுவை சிகிச்சை, எலும்பு முறிவு அறுவை சிகிச்சை உள்ளிட்ட சிகிச்சைகளை மேற்கொள்வோர் மற்றும் குறை பிரசவ குழந்தைகளின் மறுவாழ்வில், "பிசியோதெரபிஸ்ட்'களின் பங்கு குறிப்பிடத்தக்கது.

1988ம் ஆண்டில், தமிழ்நாடு டாக்டர் எம்.ஜி.ஆர்., மருத்துவ பல்கலைக்கழகம் பிசியோதெரபிஸ்ட் நான்கரை ஆண்டு படிப்பை அறிமுகப்படுத்தியது. தமிழகத்தில் ஆண்டுதோறும்,1,000 பேர் பிசியோதெரபிஸ்ட் பட்டம் பெறுகின்றனர். இதுவரை, 20 ஆயிரம் பேர் பட்டம் பெற்றுள்ளனர். தமிழகத்தில் உள்ள 35 பிசியோதெரபி பட்டப்படிப்பு அளிக்கும் கல்லூரிகளில் இரண்டு மட்டுமே அரசு கல்லூரிகள். இவற்றிலும் போதுமான பேராசிரியர்கள் இல்லை. கிராமப்புறங்களில் புதிய பிசியோதெரபி கல்லூரிகள், மாநில பிசியோதெரபி கவுன்சில், அரசு மருத்துவமனைகளில் பிசியோதெரபிஸ்டுகளுக்கு புதிய பணி நியமனங்கள் போன்ற தமிழக அரசின் அறிவிப்புகள் ஆண்டுக்கணக்கில் செயல்படுத்தப்படவில்லை. குறிப்பாக அரசு மருத்துவமனைகளில், 200க்கும் குறைவான பணியிடங்களே உள்ளன. பெரிய மருத்துவமனைகளில் மட்டுமே பிசியோதெரபிஸ்டுகள் நியமிக்கப் படுகின்றனர். தாலுகா மருத்துவமனைகள், ஆரம்ப சுகாதார நிலையங்களில் பிசியோதெரபிஸ்டுகள் இல்லாததால், கிராம மக்களுக்கு பிசியோதெரபி சிகிச்சை கிடைப்பதில்லை. இதனால் பிசியோதெரபி பட்டதாரிகளின் எதிர்காலம் கேள்விக் குறியாகி வருகிறது.

தமிழகத்தில் பிசியோதெரபிஸ்டுகளின் சராசரி மாத வருமானம், 5,200 ரூபாய் முதல் 15,200 ரூபாய் வரையே உள்ளது. அரசு வேலை வாய்ப்பு இல்லாததாலும், தனியார் மருத்துவமனைகளில் குறைவான வருமானம் கிடைப்பதாலும் வேறு வேலைகளைப் பார்க்க வேண்டிய சூழ்நிலைக்கு தள்ளப்பட்டுள்ளனர். பிசியோதெரபி படிப்புக்கு போதிய வரவேற்பில்லாததால் பல பிசியோதெரபி கல்லூரிகள் தற்போது மூடப்பட்டு வருகின்றன. இதனால், பிசியோதெரபி சிகிச்சை தேவைப்படும் நோயாளிகளின் எண்ணிக்கை அதிகமாக இருந்தும், அவர்களுக்கு சிகிச்சை அளிக்க திறமையான பிசியோதெரபிஸ்டுகள் இல்லாத நிலை உருவாகும்.

இதற்கிடையில், பிசியோதெரபிஸ்டுகளின் அங்கீகாரத்தை முறைப்படுத்த, பிசியோதெரபி கவுன்சில் (மாநில உடலியக்க மருத்துவர் பெருமன்றம்) அமைக்க வேண்டும் என கோரிக்கை விடுக்கப்பட்டது. சில தனியார் மருத்துவமனைகளில் நர்சுகள் மற்றும் முறையாக பிசியோதெரபி பட்டம் பெறாதவர்களை கொண்டு பிசியோதெரபி சிகிச்சை அளிக்கப்படுகிறது. இது நோயாளிகளின் உயிருக்கே ஆபத்தாகிவிடும். இதை கட்டுப்படுத்தவும் போலி பிசியோதெரபிஸ்டுகளை தடுக்கவும் கவுன்சில் விரைவில் அமைக்கப்பட வேண்டியது அவசியமாக உள்ளது.

மாநில பிசியோதெரபி கவுன்சில் அமைப்பதற்கான அரசாணை, 2008ம் ஆண்டு, அக்டோபர் 18-இல் வெளியானது. ஆனால் அக்கவுன்சில் அமைக்கப்படவில்லை. இதனால், பணி பாதுகாப்பின்மை, பணிக்கு சட்டரீதியான அங்கீகாரம் கிடைக்காதது உள்ளிட்ட பிரச்னைகளுக்கு பிசியோதெரபிஸ்டுகள் ஆளாகி வருகின்றனர். "பிசியோதெரபி'யில் முதுநிலை பட்டப்படிப்பு (எம்.பி.டி.,) முடித்தவர்கள் தான், பிசியோதெரபி கல்லூரிகளில் முதல்வராக இருக்க வேண்டும். ஆனால் அரசு பிசியோதெரபி கல்லூரிகளில், இந்நடைமுறை பின்பற்றப்படவில்லை. அரசு கல்லூரிகளில் எம்.பி.டி., பட்டப்படிப்பும் இதுவரை துவங்கவில்லை.

உள்நாட்டில் பிசியோதெரபிஸ்டுகளுக்கு வேலை வாய்ப்பு குறைவாக உள்ளது. வெளிநாடுகளில் வேலை வாய்ப்பு பெற வேண்டுமானால், மாநில பிசியோதெரபி கவுன்சிலின் அங்கீகாரம் அவசியம். ஆனால் இப்போது கவுன்சில் இல்லாததால் வெளிநாடுகளில் வேலை பெறுவதில் சிரமங்கள் ஏற்படுகின்றன. மேலும், பிசியோதெரபிஸ்டுகள் தங்களது பெயருக்கு முன், 'டாக்டர்' என போட்டுக் கொள்ள "அலோபதி' டாக்டர்கள் சங்கம் எதிர்ப்பு தெரிவித்துள்ளது. ஆனால், பிற மாநிலங்களில் பிசியோதெரபிஸ்டுகள், தங்கள் பெயருக்கு முன், டாக்டர் என போட அனுமதிக்கப்படுகின்றனர் என பிசியோதெரபிஸ்டுகள் கூறுகின்றனர்.

முன்னதாக சுகாதாரத் துறை வெளிட்ட அரசாணையில் தமிழ்நாடு மாநில உடலியக்க மருத்துவ பெருமன்றத்தின் கட்டமைப்பு, அதன் அதிகாரங்கள், பணிகள், தேர்தல் முறை, பெருமன்றத்தின் கூட்டம் ஆகியன பற்றி விவரிக்கப் பட்டுள்ளது. அது யார் 'பிசியோதெரபி' என்பதற்கு வரையறை தரும் போது, "யார் ஒருவர் அங்கீகரிக்கப்பட்ட உடலியக்க மருத்துவ கல்விக்கான பட்டத்தை பெற்று, அத்துடன் அவரது பெயர் உடலியக்க பெருமன்றத்தின் பதிவேட்டில் பதியப்பட்டுள்ளதோ அவர் 'பிசியோதெரபி' ஆவார் என்று கூறுகிறது. அதே நேரத்தில் அவர் தனது பெயருக்கு முன்னால் Dr. என்ற பட்டத்தை போட்டுக் கொள்ளக் கூடாது என்றும், அவர் மருந்து ஏதும் எழுதிக் கொடுக்கக் கூடாது என்றும் அந்த ஆணை கூறுகிறது. ("Physiotherapist” means a person who possesses recognized physiotherapy education and whose name has been entered in the Register of Physiotherapy Council. He shall not use “Dr” before his name and prescribe drugs)

இப்படி நிறைய பிரச்சனைகள் இவர்களுக்கு உள்ளன. இவற்றையெல்லாம் களைய பலமுறை பிசியோதெரபிஸ்ட்கள் போராட்டம் நடத்தி உள்ளனர். அரசிடம் கோரிக்கை விடுத்தனர். ஆனால் பலன் ஏதும் கிட்டவில்லை.

இன்றைய நவீன மருத்துவத்தில் தவிர்க்க முடியாதவர்களாக உள்ள, "பிசியோதெரபிஸ்ட்'களின் கோரிக்கைகளை, தமிழக அரசு நிறைவேற்ற வேண்டும். இல்லையெனில், பட்டப்படிப்பிற்கு இத்துறையை தேர்ந்தெடுக்கும் மாணவர்கள் எண்ணிக்கை மெல்ல மெல்ல குறைந்து, நாளடைவில் இத்துறை அழியும் அபாயம் ஏற்படும். ஏற்கனவே பிசியோதெரபி படித்தவர்களின் மவுசும் மறைந்து போகும்.

கிராம நிருவாக அலுவலர்களே சுதாரித்துக் கொள்ளுங்கள் !

2011-10-10T01:14:00.000+05:30

"எந்த கிராமத்திற்கு ஒருவர் கிராம நிருவாக அலுவலராக நியமனம் செய்யப்படுகிறாரோ அந்தக் கிராமத்திலேயே அவர் வசிக்க வேண்டும். அங்கு அவர் அப்பதவியை வகிக்கும் காலம் வரை அப்படியே தொடர்ந்து வசிக்க வேண்டும். இது குறித்து அரசு பிறப்பித்துள்ள குறிப்புரை கண்டிப்பாக பின்பற்றப்பட வேண்டும். கிராம நிருவாக அலுவலர்கள் தங்கள் பதவி இடத்திலேயே வசிக்கிறார்களா என்பதை அவர்களது மூத்த அலுவலர்கள் கண்காணிக்க வேண்டும். அவ்வாறு கண்காணிக்கத் தவறும் அந்த மூத்த அலுவலர்களுக்கு எதிராகவும் நடவடிக்கை எடுக்கப்பட வேண்டும். "

இவ்வாறு பொது நல வழக்கு ஒன்றில் நமது மாண்பமை சென்னை உயர் நீதிமன்றம் தீர்ப்புரைத்துள்ளது.

எனவே கிராம நிருவாக அலுவலர்களே விழிப்புடன் இருங்கள். எந்த கிராமத்தில் பதவியில் இருக்கிறீர்களோ அதே கிராமத்தில் வசிக்க, வாழ பழகுங்கள். "நான் நாமக்கல்லே எங்கவூட்டுலேதான் இருக்கேன். ஏதாவதுன்ன கூப்புடுங்க" என்று கொல்லிமலை கிராம நிருவாக அலுவலர் சொன்னால் அவருக்கு அஷ்டமத்து சனி பிடிக்கப் போகுதுன்னு அர்த்தம். அதுக்கு மேல் அவரை கண்காணிக்காமல் விட்ட வட்டாட்சியர், மாவட்ட வருவாய் அலுவலர் எல்லோருக்கும் உயர் நீதிமன்ற தீர்ப்புபடி சிக்கல்தான்.

ஏன் இப்படி ஒரு கெடுபிடியான தீர்ப்பை மாண்பமை தலைமை நீதியரசர் எம்.ஒய்.இக்பால் மற்றும் மாண்பமை நீதியரசர் டி.எஸ். சிவஞானம் அடங்கிய ஈராயம் (டிவிசன் பெஞ்ச்) பிறப்பிக்க வேண்டும்? இது ஒரு நல்ல கேள்வி.

நாம் 'வி.ஏ.ஒ.' என்று ரத்தினச் சுருக்கமாக 'செல்லமாக' அழைக்கும் (வி.ஏ.ஒ.-க்கள் ஒரு கையெழுத்துக்காக அலையவிடும் போது இந்த 'செல்லம்' இருக்காது) இந்த அரசு அலுவலருக்கு எவ்வளவு வேலை இருக்கு தெரியுமா?

1 . கிராம வருவாய் கணக்குகளை பராமரிக்க வேண்டும்.

2. நில வரி உள்ளிட்ட பல்வேறு வரிகளை வசூலிக்க வேண்டும்.

3. சாதிச் சான்றிதழ், வருமானச் சான்றிதழ், இருப்பிடச் சான்றிதழ், சொத்து மதிப்பை கணக்கிடுதல் ஆகியவை தொடர்பாக அறிக்கை அனுப்ப வேண்டும்.

4. பிறப்பு மற்றும் இறப்பு பதிவேட்டை பராமரிக்க வேண்டும்.

5. தீ விபத்து, வெள்ளம், புயல், இன்னும் இது போன்ற இயற்கை பேரழிவுகள் குறித்து மொத்த அலுவலர்களுக்கு அறிக்கை அனுப்ப வேண்டும்.

6. கொலை, தற்கொலை மற்றும் சந்தேகத்திற்கிடமான மரணம் குறித்து காவல் அலுவலர்களுக்கு தகவல் தெரிவிக்க வேண்டும். அவர்களது புலன் விசாரணைக்கு உதவி புரிய வேண்டும்.

7. வருவாய் நிலை ஆணையின் விதி 18-பி -இன் கீழ் தங்கள் கிராம எல்லைக்குள் உள்ள சாலையோர மரங்களை கிராம நிருவாக அலுவலர்கள் பாதுகாத்து பேணி வளர்க்க வேண்டும். அம்மரங்களுக்கு சேதம் அல்லது இழப்பு அதாவது அறுத்துக் கொண்டு போதல் (திருட்டு), விழுந்து விடுதல் ஆகியன ஏற்பட்டால் அதற்கு கிராம நிருவாக அலுவலர்களே பொறுப்பு.

8. வருவாய் நிலை ஆணையின் விதி 18-பி -இன் படி ஆக்கிரமிப்புகளை தடுக்காமல் இருந்தாலோ, அது குறித்து அறிக்கை அனுப்பாமல் இருந்தாலோ அதற்கு கிராம நிருவாக அலுவலர்களே பொறுப்பு ஆவார்கள்.

இப்படி நிறைய பணிகள் கிராமத்தை சுற்றி வி.ஏ.ஒ-க்கு இருக்கின்றன. எனவே தமிழ் நாடு அமைச்சு பணி விதிகளின் விதி 38(b)(iii) படி ஒரு கிராம நிருவாக அலுவலர், அவர் பணியாற்றும் கிராமத்திலேயே வசிக்க வேண்டும் என்பதை உயர் நீதிமன்றம் வலியுறுத்த வேண்டும் என்று கே.எஸ்.விவேகானந்தம் என்பவர் சென்னை உயர் நீதிமன்றத்தில் தொடுத்த பொது நல வழக்கில் மேற்கண்டவாறு ஆணை பிறப்பிக்கப்பட்டுள்ளது.

இப்படி ஆணை பிறப்பிக்கும் போது கிராமங்களில் உள்ள அரசு மருத்துவமனைக்கு (ஆரம்ப சுகாதார மையங்கள்) நியமனம் செய்யப்படும் மருத்துவர்களையும் சென்னை உயர் நீதிமன்றம் விட்டு வைக்கவில்லை. நகரத்திலோ, மாவட்ட தலைநகரிலோ வசித்துக் கொண்டு தாங்கள் பணியாற்றும் கிராம மருத்துவமனைக்கு மாதத்தில் சில நாட்கள் மட்டும் சென்று பணி செய்யும் பழக்கத்தை சென்னை உயர் நீதிமன்றம் கண்டிக்கும் தொனியில் தனது தீர்ப்பில் கூறியது. அவர்கள் கிராமத்தில் வசிப்பதில்லை என்றும் கூறியது.

எனவே தாங்கள் பணியாற்றும் இடத்தில் வசிக்காத கிராம நிருவாக அலுவலர்கள் ஒழுங்கு நடவடிக்கைக்கு ஆளாவது திண்ணம். சுதாரித்துக் கொள்ளுங்கள் வி.ஏ.ஒ. நண்பர்களே ! அவர்களது மேலதிகாரிகளே !!

அத்துடன் கிராம அரசு மருத்துவர்களே !!!

Constitution of India, Article 226 - Public Interest Litigation - Tamil Nadu Ministeral Service Rules, Rule 38(b)(iii) - Every person appointed as Village Administrative Officer shall reside in village under his charge and shall continue to reside in said village so long as he continuous to hold post - Government's instruction in this regard to be strictly adhered to - VAOs have innumerable tasks to perform - Held, Writ Petition is disposed of with a direction to initiate action also against Senior Officials who fail to supervise them.

K.S.Vivekanandam v. The Chief Secretary, Government of Tamil Nadu - Madras High Court - M.Y.Eqbal, C.J. & T.S.Sivagnanam, J. - W.P. No. 7922 of 2011 - Decided on 16-6-2011.

Citation : 2011 (5) CTC 515